Топ-менаџерите на ServiceNow ја стопираат продажбата на акции за да ја зголемат довербата на инвеститорите

Многу од врвните извршни лица на ServiceNow Inc. ги откажуваат редовно закажаните продажби на акции како дел од стратегија за зајакнување на довербата на инвеститорите, соопшти компанијата во регулаторно известување.

Извршниот директор Бил Макдермот, исто така, ќе купи акции во вредност од 3 милиони долари лично, со што сака да испрати сигнал дека компанијата е потценета.

Компаниите за апликациски софтвер, вклучително и ServiceNow, забележаа значителен пад на вредноста на акциите минатата година, поради стравувања од новата конкуренција во ерата на вештачката интелигенција. ServiceNow, со седиште во Санта Клара, Калифорнија, загуби речиси половина од својата вредност во последните 12 месеци, слично како Adobe и Salesforce.

„Менџментот јасно испраќа сигнал до пазарот дека верува дека акциите на компанијата се потценети и неправедно погодени од пошироката распродажба во софтверскиот сектор,“ вели Арџун Бхатиа, аналитичар во William Blair. По објавата, акциите краткорочно пораснаа за околу 3%, но подоцна паднаа како дел од поширокото пазарно слабеење.

Во обид да ја промени перцепцијата, ServiceNow најави и дополнителни откупи на акции во вредност од 5 милијарди долари.

Покрај Макдермот, плановите за продажба ги откажаа и финансиската директорка Џина Мастантуоно, директорката за човечки ресурси Жаклин Кени, специјалниот советник Расел Елмер и потпретседателот Николас Тзицон.

Аналитичарите предупредуваат дека иако овие чекори се позитивни, инвеститорите би се чувствувале посигурни ако Макдермот купеше поголем обем акции — редот на десетици милиони долари — слично на примерот со Џејми Димон од JPMorgan во 2016 година.