САД и Јапонија ги открија првите проекти од фондот тежок 550 милијарди долари

Соединетите Американски Држави и Јапонија ги претставија првите проекти од заедничкиот инвестициски фонд вреден 550 милијарди долари, со што го интензивираат спроведувањето на трговско-економскиот договор постигнат минатата година. Објавата доаѓа во пресрет на најавената средба во Вашингтон меѓу јапонската премиерка Санае Такаичи и американскиот претседател Доналд Трамп.

Трамп соопшти дека првиот пакет средства ќе биде насочен кон изградба на гасна електрана во Охајо, проект за експлоатација на критични минерали во Џорџија и постројка за течен природен гас во Тексас. Засега не се објавени детали за тоа кои компании ќе бидат вклучени, ниту како точно ќе се структурира финансирањето. Американскиот претседател повторно нагласи дека тарифите одиграле клучна улога во постигнувањето на договорот, алудирајќи на притисокот врз Токио да ги зголеми инвестициите во САД.

Фондот од 550 милијарди долари е централен дел од договорот со кој Вашингтон воведе царини од 15 проценти на јапонскиот увоз, вклучително и автомобилите – еден од најважните столбови на јапонската економија. Намалувањето од претходно најавените повисоки царински стапки беше поврзано со обврската на Јапонија да поттикне значителни вложувања во клучни американски индустрии.

Американскиот министер за трговија Хауард Латник и јапонскиот министер за економија и трговија Рјосеи Аказава минатата недела одржаа разговори во Вашингтон за финализирање на деталите за првата фаза од инвестициите. Јапонската страна нагласува дека проектите ќе бидат насочени кон стабилни и одржливи приноси, наместо кон високоризични вложувања.

Меѓу потенцијалните области се енергетиката, вештачката интелигенција и критичните минерали, со можност за учество на големи јапонски и американски компании. Клучна улога во финансирањето се очекува да имаат јапонските државни финансиски институции, при што најголемиот дел од средствата ќе бидат обезбедени преку заеми и гаранции, а само мал дел како директни инвестиции.

Според договорот, Јапонија има рок од 45 работни дена да обезбеди финансирање за одобрените проекти. Доколку тоа не се случи, САД би можеле повторно да воведат повисоки царини – сценарио што претходно беше најавувано со можност за зголемување до 25 проценти.

Објавата следува по изборната победа на Такаичи, која најави дека ќе ги продлабочи стратешките односи со Вашингтон. Доналд Трамп јавно ѝ посака успех, истакнувајќи ја важноста на силното партнерство меѓу двете земји во услови на глобална економска и геополитичка неизвесност