Нова стратегија на Епл: Паметни очила, „пин“ уред и AirPods со вештачка интелигенција

Технолошкиот гигант Apple Inc. го забрзува развојот на нова генерација носливи уреди, со кои сака да фати чекор во трката за хардвер базиран на вештачка интелигенција. Компанијата работи на паметни очила, „пин“ уред што се носи на облека или како ѓердан, како и на AirPods со напредни АИ функции — сите поврзани со iPhone и дигиталниот асистент Siri.

Според информации од извори блиски до проектот, новите уреди ќе се потпираат на камери и сензори кои ќе ѝ овозможат на Siri да „разбира“ визуелен контекст и да извршува задачи во реално време. Очилата, кои интерно се развиваат под кодно име N50, се најамбициозниот производ во оваа линија и би можеле да влезат во производство до крајот на годинава, со можно лансирање во 2027 година.

За разлика од скапите слушалки Vision Pro, кои не наидоа на очекуваниот одѕив, новите паметни очила нема да имаат екран. Наместо тоа, ќе користат звучници, микрофони и две камери — една за фотографии и видео, и друга за компјутерска визија, слична на технологијата во Vision Pro. Целта е уредот да функционира како постојан АИ асистент, способен да препознава објекти, да чита текст, да додава настани во календар или да дава навигациски насоки според реални обележја.

Покрај очилата, Apple развива и мал уред со големина на AirTag, кој може да се прикачи на облека или да се носи како ѓердан. Овој „пин“ би служел како „очи и уши“ на iPhone, со камера и микрофон за интеракција со Siri. Уредот нема да има екран и ќе се потпира на телефонот за процесирање на податоците.

Во меѓувреме, се подготвува и нова верзија на AirPods со интегрирани камери и дополнителни АИ функции. Apple веќе воведе функции како превод во живо, а идните модели би можеле уште повеќе да ја продлабочат интеграцијата со вештачката интелигенција.

Со овој потег, Apple директно влегува во конкуренција со Meta Platforms Inc., чии паметни очила веќе бележат комерцијален успех, како и со OpenAI, кој исто така развива сопствени АИ уреди во соработка со поранешни дизајнери на Apple.

Иако продажбата на iPhone останува стабилна, компанијата се соочува со предизвици во развојот на напредна верзија на Siri и заостанува во некои сегменти од АИ трката. Новата стратегија со носливи уреди претставува обид да се создаде нова категорија производи што ќе го зацврсти екосистемот на Apple и ќе ја дефинира следната фаза на технолошката еволуција.