Колку навистина заработуваат сопствениците на апартмани на море? Бројките ќе ве изненадат

Купувањето апартман на море со години се смета за една од најпривлечните инвестиции во регионот. Голем број сопственици на недвижности во Хрватска, Црна Гора и Грција очекуваат дека летната сезона ќе им донесе солидна заработка, додека истовремено добиваат и сопствено место за одмор. Сепак, зад високите цени за ноќевање се крие многу покомплексна финансиска пресметка.

На прв поглед, приходите изгледаат импресивно. Помал апартман за две до четири лица, сместен во популарна туристичка дестинација, најчесто се издава по цена од 50 до 100 евра за ноќ. Ако биде резервиран околу 60 дена во текот на сезоната, со просечна цена од 70 евра, сопственикот може да оствари приход од приближно 4.200 евра.

Доколку побарувачката е поголема и апартманот биде издаден околу 100 ноќевања по просечна цена од 80 евра, приходот може да достигне околу 8.000 евра. Луксузните апартмани и вилите на најатрактивните локации можат да остварат и значително повисоки приходи, особено ако сезоната трае подолго и исполнетоста е висока.

Но, приходот не е исто што и чиста заработка. Голем дел од парите што ги плаќаат гостите завршуваат за покривање на различни трошоци кои се неизбежен дел од овој бизнис.

Меѓу најголемите расходи се редовното чистење и подготовка на сместувањето меѓу два престои, одржувањето на мебелот и опремата, плаќањето струја, вода, интернет и комунални услуги, како и даноците и туристичките такси. Дополнително, сопствениците плаќаат провизии на платформите за онлајн резервации, а често инвестираат и во рекламирање за да обезбедат подобра пополнетост.

За оние што не живеат во местото каде што се наоѓа апартманот, трошоците дополнително растат. Во такви случаи најчесто се ангажира лице или агенција која ги пречекува гостите, се грижи за сместувањето и ги решава секојдневните обврски, што дополнително ја намалува конечната заработка.

Локацијата останува најважниот фактор за успешноста. Апартманите што се наоѓаат во непосредна близина на плажа, имаат поглед кон морето, обезбеден паркинг и дополнителни содржини многу полесно наоѓаат гости и можат да постигнат повисоки цени. Наспроти тоа, недвижностите во помалку атрактивни места често имаат пократка сезона и поголем број денови без резервации.

Поради силната конкуренција, многу сопственици секоја година вложуваат во реновирање, модернизирање на ентериерот и подобрување на услугата, со цел да привлечат повеќе гости и да ја продолжат туристичката сезона.

Иако приходите можат да бидат значителни, враќањето на инвестицијата најчесто трае со години. Цените на недвижностите на морето во последниот период значително пораснаа, па за купување апартман е потребен сериозен почетен капитал. Затоа, исплатливоста не треба да се пресметува само според приходите во текот на летото, туку и според сите годишни трошоци, периодите кога сместувањето е празно и долгорочните вложувања во одржување.

Експертите посочуваат дека издавањето апартман може да биде стабилен извор на дополнителен приход, но не претставува лесна и брза заработка. Најдобри резултати постигнуваат сопствениците кои располагаат со добра локација, нудат квалитетно сместување, имаат реално формирани цени и професионално се однесуваат кон гостите.

За сите што размислуваат да инвестираат во недвижност на море, најважно е однапред да направат детална финансиска анализа. Високата цена за ноќевање може да создаде впечаток за голема добивка, но вистинската заработка зависи од многу повеќе фактори отколку што изгледа на прв поглед.