Forbes ги избра 100-те најиновативни компании во Америка: На врвот е Eli Lilly, пред Apple и NVIDIA

Фармацевтскиот гигант Eli Lilly е прогласен за најиновативна голема компанија во Америка според најновото рангирање на Forbes. На листата зад него следат Apple и NVIDIA, додека меѓу првите десет се и Amgen, Meta Platforms, Amazon, Alphabet, Boeing, Oracle и Mastercard.

Листата е составена со помош на новиот Forbes индекс за иновативност, кој ги зема предвид различните показатели поврзани со способноста на компаниите да развиваат нови производи, технологии и деловни решенија. Покрај патентите и интелектуалната сопственост, анализирани се и вложувањата во истражување и развој, довербата на инвеститорите, приносот на капиталот, како и реакциите на медиумите, потрошувачите и јавноста.

Forbes ги анализирал компаниите од индексот S&P 500, а најдобрите 100 се најдоа на конечната листа.

Eli Lilly го освои првото место пред сè поради брзината со која развива нови лекови и силното присуство во една од најбрзо растечките области на фармацевтската индустрија. Компанијата стои зад лековите Mounjaro и Zepbound, а големо внимание привлекува и развојот на retatrutide, терапија која делува на три различни рецептори.

Според податоците наведени во анализата, во третата фаза од клиничките испитувања retatrutide довел до просечно намалување на телесната тежина од 28 отсто. Eli Lilly истовремено развива терапии за повеќе сериозни заболувања, меѓу кои Алцхајмерова болест, рак на дојка и мигрена.

Високо место има и Apple, која е втора на листата, додека NVIDIA се најде на третото место, што дополнително ја потврдува важноста на полупроводниците и технологиите поврзани со вештачката интелигенција во денешната економија.

Amazon, кој е рангиран на шестото место, е издвоен и поради развојот на роботиката. Компанијата користи автономни роботи со вештачка интелигенција кои се движат низ магацините и работат во непосредна близина на луѓето.

Особено внимание во анализата добива Mastercard, кој е на десеттото место. Финансиската компанија развива технологии поврзани со токенизација, дигитални трансакции, биометрија и безбедност, а работи и на системи во кои вештачката интелигенција би можела самостојно да иницира трансакции.

Новина во овогодишното рангирање е и употребата на вештачка интелигенција од страна на Forbes при оценувањето на компаниите. Анализирани биле илјадници соопштенија, објави, изјави на директори и други материјали со помош на таканаречени синтетички публики, моделирани според инвеститори, аналитичари, новинари и потрошувачи.

Рангирањето покажува дека иновативноста не е ограничена само на технолошкиот сектор. На листата се наоѓаат фармацевтски компании, производители на полупроводници, финансиски институции, производители на авиони, компании за сајбер-безбедност, медицински производи, енергетика, забава и други индустрии.

Интересен пример е Boeing, кој и покрај проблемите со кои се соочуваше во последните години, се најде на високото осмо место. Forbes во неговиот случај ја земал предвид и ширината на патентното портфолио и бројот на области во кои компанијата развива нови технологии.

На 76. место се наоѓа Lumentum, компанија која е помалку позната кај пошироката јавност, но има значајна улога во развојот на комуникациски технологии и ласерски системи.

Целосната листа на 100-те најиновативни големи компании во Америка изгледа вака: