Anthropic го надмина OpenAI и стана највредниот AI стартап во светот

Anthropic стана највредниот стартап за вештачка интелигенција во светот откако обезбеди нова инвестиција од 65 милијарди долари, со што неговата пазарна вредност достигна речиси еден билион долари. По завршувањето на најновата рунда на финансирање, компанијата е проценета на 965 милијарди долари, надминувајќи го OpenAI, кој во март годинава беше вреднуван на 852 милијарди долари по новата инвестиција.

Во финансирањето учествуваа неколку големи инвестициски фондови, меѓу кои Altimeter Capital, Dragoneer, Greenoaks и Sequoia Capital. Новата проценка претставува драматичен раст за Anthropic, кој само неколку месеци претходно беше вреднуван на 380 милијарди долари при тогашната инвестиција од 30 милијарди долари.

Од компанијата соопштија дека средствата ќе бидат насочени кон понатамошен развој на истражувањата поврзани со безбедноста на вештачката интелигенција, како и кон проширување на компјутерските капацитети потребни за поддршка на сè поголемиот број корисници на нивниот водечки модел Claude.

Во меѓувреме, доминацијата на ChatGPT на глобалниот пазар постепено се намалува. Според податоците на SensorTower, во вториот квартал од 2026 година ChatGPT учествувал со 47 проценти од сите преземања на апликации базирани на вештачка интелигенција, што е значително помалку во споредба со 67 проценти во истиот период лани. Од друга страна, Claude бележи силен подем и веќе достигнува удел од 14 проценти од вкупните преземања, наспроти само еден процент во претходните квартали.

Anthropic е основан во 2021 година од поранешни високи функционери на OpenAI, меѓу кои се братот и сестрата Дарио и Даниела Амодеи. Од своето формирање досега, компанијата има привлечено повеќе од 130 милијарди долари инвестиции. Според последните податоци, нејзиниот годишен приходен потенцијал надминал 47 милијарди долари.

Дополнителен поттик за растот на компанијата претставува и неодамнешниот договор со SpaceX за користење на суперкомпјутерот „Colossus“, со што треба да се зголемат капацитетите за корисниците на претплатничките пакети Claude Pro и Claude Max.

Сепак, брзиот подем на Anthropic не поминува без контроверзии. Компанијата е во правен спор со американските власти откако одби да овозможи неограничен пристап до своите модели на вештачка интелигенција. Од Anthropic тврдат дека таквиот пристап би можел да биде искористен за масовен државен надзор и развој на автоматизирани системи за вооружување. По оваа одлука, Пентагон ја означи компанијата како потенцијален ризик за националниот безбедносен синџир на снабдување, оценка што Anthropic ја оспорува пред судските институции.