Објавена листата на најдобри земји за преселување: Европа доминира на врвот

Швајцарија е прогласена за најдобра земја за живот и преселување во 2026 година според најновото глобално истражување за миграциски трендови. Анализата опфати 82 држави и ги рангираше врз основа на 34 различни критериуми, меѓу кои се трошоците за живот, висината на платите, квалитетот на здравствената заштита, безбедноста, образовниот систем, куповната моќ, културните содржини и општото ниво на среќа на населението.

По второто место минатата година, Швајцарија сега се искачи на врвот благодарение на исклучително високите приходи што им стојат на располагање на жителите, квалитетниот здравствен систем и високото ниво на безбедност. Дополнителен фактор за нејзиниот успех е добро развиената инфраструктура за странски државјани, како и широката понуда на меѓународни училишта и сигурно снабдување со енергија.

Веднаш зад Швајцарија се најде Исланд, кој доби високи оценки поради безбедноста, еколошките стандарди и квалитетот на живот. Земјата е препознаена и по силните семејни политики и високото ниво на задоволство кај населението, иако ограничениот број меѓународни училишта влијаел врз нејзиното рангирање.

Третото место му припадна на Луксембург, кој се издвојува со високите примања и стабилната општествена средина. Малата европска држава останува атрактивна дестинација за луѓето кои бараат економска сигурност и висок животен стандард во срцето на Европа.

Во првите пет најпосакувани земји за живот се најдоа и Австралија и Германија. Австралија е единствената неевропска држава во ова друштво и е препознаена по отвореноста кон доселениците, силниот пазар на труд и начинот на живот кој е тесно поврзан со природата. Германија, пак, продолжува да привлекува луѓе благодарение на стабилната економија, заштитата на работничките права и добрите можности за долгорочна кариера.

Меѓу десетте најдобро рангирани земји за преселување се најдоа уште Ирска, Соединетите Американски Држави, Данска, Норвешка и Шпанија.

Истражувањето посветило посебно внимание и на условите за семеен живот. Во оваа категорија Шпанија се истакнала како една од најпривлечните дестинации благодарение на развиената социјална инфраструктура и условите што ги нуди за семејствата кои сакаат да изградат стабилна иднина во странство.

Интересно е што меѓу десетте најдобри земји за семеен живот се најде и Хрватска, која го зазеде десеттото место. Покрај неа, во европскиот дел од листата се вклучени и Обединетото Кралство, Исланд и Шпанија. Во врвот се најдоа и Кина, САД, Шри Ланка, Обединетите Арапски Емирати, Австралија и Бангладеш.

Извештајот ги анализирал и трошоците за живот, споредувајќи ги платите, кириите, цените на храната и куповната моќ на населението. Во оваа категорија најдобро рангирана е Саудиска Арабија, која нуди поволна рамнотежа меѓу приходите и секојдневните трошоци.

Од европските држави најдобро пласирани се Норвешка и Данска, додека Луксембург и Ирска исто така се меѓу водечките земји кога станува збор за финансиската исплатливост на животот. Во првите десет според овој критериум се најдоа и Бангладеш, САД, Оман, Пакистан и Непал.

Резултатите покажуваат дека и во 2026 година европските држави доминираат кога станува збор за квалитетот на животот, безбедноста и економските можности, додека неколку азиски и блискоисточни земји успешно се позиционираат како атрактивни дестинации за оние што бараат подобар животен стандард и пониски животни трошоци.