Од царските визби до светските колекционери: Грузија ја продава винската колекција на Сталин

Грузиските власти подготвуваат продажба на една од најнеобичните вински колекции во светот – богат трезор со околу 40.000 ретки шишиња вино, поврзани со поранешниот советски лидер Јосиф Сталин. Средствата од најавената аукција ќе бидат наменети за формирање образовен центар посветен на развојот на винската индустрија во земјата.

По првпат оваа недела јавноста доби можност да погледне дел од колекцијата што се чува во специјален вински трезор во Тбилиси. Станува збор за вина од Грузија и Франција, меѓу кои има примероци стари повеќе од два века. Колекцијата претставува значајно историско и културно наследство, а властите сметаат дека нејзината продажба може дополнително да го промовира грузиското винарство на светската сцена.

Во проектот е вклучен и познатиот грузиски винопроизводител Иракли Гилаури, кој соработува со Министерството за земјоделство. Според него, аукцијата има потенцијал да привлече внимание од колекционери и инвеститори од целиот свет и да ја зацврсти позицијата на Грузија како една од најважните вински дестинации.

Грузија со години се претставува како лулка на винската култура. Археолошките откритија укажуваат дека на нејзина територија вино се произведувало уште пред околу осум илјади години, што ја прави една од најстарите вински региони во светот.

Посебен интерес предизвикува историската позадина на колекцијата. Јосиф Сталин, кој е роден во Грузија и повеќе од две децении го водеше Советскиот Сојуз, бил страстен љубител на виното. Неговата збирка содржела шишиња од престижни француски лозја во Бордо, како и бројни грузиски вина што лично ги преферирал.

Дел од вината потекнуваат од некогашната царска колекција на руската династија Романови. По Руската револуција во 1917 година, советските власти ја конфискувале оваа вредна архива, а подоцна таа завршила под надзор на Сталин, кој со текот на времето ја надополнувал со нови и ретки примероци.

Отворањето на трезорот веќе привлече внимание кај меѓународните колекционери. Меѓу посетителите беше и американскиот колекционер Виктор Чен, кој допатува од Тексас за да ја разгледа понудата. Тој изјави дека чувството при разгледувањето на старите шишиња е како откривање на долго скриено историско богатство, додавајќи дека вакви моменти денес се исклучително ретки и можат да претставуваат значаен настан за светот на колекционерството.

Со продажбата на колекцијата, грузиските власти не само што очекуваат значителни приходи, туку и можност дополнително да го афирмираат винското наследство на земјата и да инвестираат во образување на нови генерации професионалци во оваа индустрија.