Соларната енергија ја презема глобалната доминација: Доаѓа крајот на ерата на фосилните горива

Сончевата енергија во следната деценија ќе стане најголем извор на електрична енергија во светот, надминувајќи ги јагленот, нафтата и природниот гас, покажува најновата анализа на BloombergNEF. Според извештајот, глобалниот енергетски систем влегува во период на историска трансформација, поттикната од растечката употреба на вештачка интелигенција, електрификацијата на индустриите и драматичниот пад на цените на соларната технологија.

Експертите оценуваат дека соларната енергија веќе не зависи исклучиво од климатските политики, туку пред сè од економската исплатливост. Цената на производството на струја од сонце продолжува да паѓа, што ја прави оваа технологија сè попривлечна за државите и компаниите ширум светот.

Како пример се посочува Пакистан, кој во последните две години додал околу 25 гигавати соларен капацитет откако цените на природниот гас нагло пораснаа по руската инвазија врз Украина. Аналитичарите сметаат дека ваквиот тренд би можел дополнително да се забрза доколку владите воведат поагресивни мерки за намалување на емисиите на јаглерод.

Паралелно со експанзијата на соларната енергија, расте и глобалната побарувачка за електрична енергија, особено поради развојот на дата-центрите и AI технологиите. BloombergNEF проценува дека токму дата-центрите ќе создадат огромна нова побарувачка за енергија до 2050 година, при што ќе бидат изградени дополнителни капацитети од соларни електрани, батериски системи, но и електрани на природен гас и јаглен.

Сепак, поради можноста гасот и јагленот да обезбедуваат континуирано производство 24 часа дневно, тие и понатаму ќе имаат значајна улога во снабдувањето на големите технолошки капацитети. Аналитичарите предупредуваат дека технолошките компании и операторите на дата-центри ќе имаат огромно влијание врз тоа кои енергетски извори ќе останат доминантни во иднина.

Во меѓувреме, забрзано се развиваат и батериските технологии. Поради големото производство на соларна енергија во земји како Шпанија и Италија, цените на струјата преку ден значително паднале, што ги натерало инвеститорите да комбинираат соларни паркови со големи батериски системи за складирање енергија и продажба во вечерните часови кога цените се повисоки.

Според прогнозите, цените на соларните панели до 2035 година би можеле дополнително да се намалат за околу 30 проценти, што ќе ја направи сончевата енергија уште поконкурентна во однос на фосилните горива. До средината на векот, соларните електрани би можеле да произведуваат повеќе од двојно повеќе електрична енергија отколку електраните на природен гас.

Аналитичарите нагласуваат дека енергетската транзиција не е само климатско прашање, туку и прашање на енергетска независност. Според нив, земјите кои ќе инвестираат во обновливи извори ќе ја намалат зависноста од увоз на енергенси и ќе станат поотпорни на глобални кризи и геополитички потреси.