Stellantis најави поширока соработка со други автомобилски компании

Stellantis ќе ја темели својата идна стратегија на партнерства и соработка со други производители, изјави извршниот директор Antonio Filosa, најавувајќи нов повеќегодишен бизнис план што компанијата ќе го претстави следната недела.

Говорејќи на конференцијата Future of the Car организирана од Financial Times, Филоса истакна дека Stellantis научил колку се важни партнерствата во современата автомобилска индустрија, особено во области како технолошки развој, подобрување на синџирите на снабдување и оптимизација на производствените капацитети.

Неговите изјави доаѓаат само неколку дена откако Stellantis објави дека ќе започне заедничко производство на автомобили во Европа со кинескиот производител Leapmotor. Со тоа, двете компании ја продлабочуваат соработката, која досега главно беше фокусирана на дистрибуција на возила.

Кинеските производители на електрични автомобили сè поагресивно бараат начини за проширување на присуството во Европа, а партнерствата со локални компании им овозможуваат побрзо производство и полесно избегнување на европските царини за електрични возила произведени во Кина.

Филоса посочи дека моделот на соработка со Leapmotor може да стане пример и за идни договори со други компании, не само од Кина. Според него, големиот производствен капацитет на Stellantis, глобалната мрежа и широкото портфолио на брендови ја прават компанијата привлечен партнер за долгорочни проекти.

Паралелно со новите партнерства, Stellantis подготвува и ревидирана стратегија за своите брендови. Компанијата, според најавите, ќе ги насочи најголемите инвестиции кон клучните марки како Jeep, Ram, Peugeot и Fiat, но нема планови за укинување на останатите брендови од групацијата.

Извршниот директор оцени дека брендовите се најголемата вредност на Stellantis и предупреди дека напуштањето на одредени марки би значело и губење на лојални купувачи во корист на конкурентите. Новата стратегија, според него, ќе се фокусира на поефикасно распределување на инвестициите, но и зачувување на локалниот идентитет и препознатливост на секој бренд.