Урсула фон дер Лајен бара поголема заштита за децата од TikTok и Instagram

Европската Комисија подготвува построги мерки за заштита на децата и тинејџерите од, како што ги нарекува, „зависничките механизми“ на социјалните мрежи. Претседателката на Европската комисија, Ursula von der Leyen, предупреди дека платформите како TikTok, Meta и X користат дизајни што го задржуваат вниманието на младите корисници на штетен начин и најави можност за воведување нови ограничувања, па дури и минимална возраст за пристап до социјалните мрежи.

Говорејќи во Копенхаген, фон дер Лајен изјави дека главното прашање повеќе не е дали младите треба да имаат пристап до социјалните мрежи, туку дали самите платформи треба да имаат толкав пристап до младите корисници. Таа предупреди на сè почестите проблеми поврзани со прекумерната употреба на дигиталните платформи, меѓу кои несоница, анксиозност, депресија, сајбер-малтретирање, зависничко однесување и експлоатација на деца.

Новите правила ќе бидат дел од претстојниот Digital Fairness Act, закон што Европската Унија планира да го претстави до крајот на годината. Според најавите, регулативата ќе се насочи кон забрана на манипулативни функции како бесконечно скролање, автоматско пуштање содржини и агресивни нотификации, кои според европските институции придонесуваат за создавање зависност кај корисниците.

Фон дер Лајен посочи дека Европската комисија веќе води постапки против TikTok поради неговиот дизајн и начинот на кој платформата ги задржува корисниците подолг период во апликацијата. Слични критики упати и кон Meta, со обвинување дека Instagram и Facebook не ги спроведуваат доволно строго правилата за минимална возраст од 13 години.

Новите мерки ќе бидат надградба на постојниот Digital Services Act, преку кој ЕУ веќе врши притисок врз големите технолошки компании да преземат поголема одговорност за штетната и нелегалната содржина. Паралелно, Унијата води истраги и за други ризици поврзани со вештачката интелигенција и дигиталните платформи.

Европските земји во последниот период сè поинтензивно размислуваат за ограничување на користењето социјални мрежи кај малолетниците, инспирирани од потезите на Австралија и други држави кои веќе воведоа или разгледуваат строги правила за пристап на тинејџери до ваквите платформи.