Златото повторно над 4.900 долари по дводневниот пад и слабата празнична трговија

Цената на златото повторно се искачи над 4.900 долари за унца, откако инвеститорите почнаа да купуваат по падот што траеше два дена, додека пазарите внимателно ги очекуваат записниците од последниот состанок на Федерални резерви на САД.

Благородниот метал порасна за повеќе од еден процент во услови на намален обем на тргување, бидејќи голем дел од азиските пазари беа затворени поради празнувањето на Лунарната нова година. Во претходните две сесии златото изгуби повеќе од три проценти, главно поради зајакнувањето на американскиот долар.

Златото бележи нестабилно движење откако кон крајот на јануари достигна рекордно високо ниво над 5.500 долари за унца. По силниот бран шпекулативни купувања, цената нагло се коригираше и за кратко падна кон 4.400 долари. Иако дел од загубите се надоместени, пазарот останува изразено променлив.

Во краток рок, инвеститорите внимателно ги следат сигналите од претставниците на Федералните резерви за идната монетарна политика. Гувернерот Мајкл Бар изјави дека каматните стапки треба да останат стабилни „одредено време“, додека не се појават појасни знаци дека инфлацијата се движи кон целта од два проценти. Од друга страна, претседателот на Федералната резервна банка во Чикаго,Остан Гулсби оцени дека има простор за дополнителни намалувања на каматите оваа година доколку инфлацијата продолжи да се намалува.

Во текот на тргувањето во Сингапур цената на златото порасна околу еден процент, додека и другите благородни метали забележаа значителен раст. Среброто порасна за повеќе од два проценти, а платината и паладиумот исто така се искачија.