Кинеската UBTech го проширува присуството во Европа преку партнерство со Airbus

Кинеската компанија UBTech Robotics, специјализирана за развој на хуманоидна роботика, објави дека склучила нов стратешки договор со европскиот воздухопловен гигант Airbus, со кој нејзините роботи ќе започнат да се користат во дел од производствените капацитети за авиони. Соработката претставува значаен чекор во амбициите на UBTech да излезе надвор од домашниот пазар и да се позиционира во едни од најтехнолошки најсложените индустриски средини во светот.

Во рамки на договорот, Airbus веќе набавил еден примерок од хуманоидниот робот Walker S2, а двете компании ќе работат заедно на тестирање на неговите можности во реални услови на производство. Целта е да се испита како ваквите роботи можат да помогнат во извршување на дел од повторувачките, физички напорни и прецизни задачи кои се составен дел од авионската индустрија, без притоа да се загрози високото ниво на безбедност и квалитет што го бара овој сектор.

Производството на авиони се смета за еден од најголемите предизвици за роботиката, бидејќи бара исклучителна точност, стабилни перформанси и строга усогласеност со безбедносните протоколи. Токму затоа, влезот на хуманоиден робот во ваква средина се гледа како важен тест за зрелоста на технологијата и нејзината подготвеност за поширока индустриска примена.

Walker S2 беше претставен во јули минатата година и е развиен специјално за работа во фабрички услови. Роботот е висок околу 1,7 метри, опремен е со напредни раце и дланки кои овозможуваат фина манипулација со алати и компоненти, како и со систем за машинска визија што му помага да ја препознава околината и безбедно да се движи низ производните хали на начин сличен на човекот.

Компанијата наведува дека соработката со Airbus ќе послужи како силна потврда на технолошките капацитети на Walker S2 во сложени и динамични работни услови. Авијацијата, според експертите, има голем потенцијал за интеграција на хуманоидни роботи, особено во сегментите каде што се извршуваат монотони, тешки или ризични операции, при што роботите можат да ја зголемат ефикасноста и да го намалат оптоварувањето на човечката работна сила.

Роботот може да носи товар до 15,5 килограми и работи со сопствено развиениот систем за вештачка интелигенција Co Agent, кој овозможува координација на движењата, препознавање на објекти и адаптација кон различни задачи на производната линија. Посебно внимание привлекува автономниот систем за замена на батерии, со кој роботот може практично да работи непрекинато, без долги застои за полнење, што е особено важно за паметните фабрики со континуирано производство.

Од моментот на своето претставување, Walker S2 веќе е применет и во други индустрии. Големи компании како автомобилскиот производител BYD и технолошкиот гигант Foxconn го воведоа роботот во своите фабрики, што укажува на постепено проширување на неговата комерцијална употреба и надминување на фазата на експериментални пилот-проекти.

Со партнерството со Airbus, UBTech дополнително ја зацврстува својата позиција на глобалната сцена и испраќа јасна порака дека кинеската роботика сè поагресивно влегува во најсофистицираните сегменти на светската индустрија.