World Labs обезбеди 1 милијарда долари за развој на нова генерација AI модели

Стартапот World Labs, основан од пионерката во вештачката интелигенција Fei-Fei Li, обезбеди инвестиција од една милијарда долари во нова рунда финансирање, со цел да развие поинаков пристап кон иднината на AI-технологијата.

Најголем поединечен инвеститор е Autodesk со вложување од 200 милиони долари, додека меѓу поддржувачите се и Andreessen Horowitz, Nvidia и Advanced Micro Devices.

World Labs е дел од новиот бран компании кои работат на т.н. „world models“ – модели на вештачка интелигенција што треба да го разберат и симулираат тродимензионалниот свет, со способност за носење одлуки во реална средина. Сличен пристап развива и стартапот AMI Labs на Јан ЛеКун.

Кон крајот на минатата година, компанијата го претстави својот прв производ – Marble, модел кој може да создава 3Д светови врз основа на текстуални или визуелни инструкции. Со новиот капитал, World Labs планира да ги унапреди решенијата за роботика, научни истражувања и други напредни примени.

Fei-Fei Li е една од клучните фигури во развојот на модерната вештачка интелигенција. Таа беше дел од тимот што го создаде ImageNet – академска база на милиони слики која го забрза развојот на алгоритмите за препознавање објекти.

Компанијата не ја откри својата моментална пазарна вредност, но според претходни информации, преговорите за финансирање се воделе околу проценка од приближно 5 милијарди долари.