Мајкрософт: Ќе го запреме развојот на вештачката интелигенција ако стане закана за човештвото

Извршниот директор на Мајкрософт за потрошувачка вештачка интелигенција, Мустафа Сулејман, изјави дека компанијата е подготвена целосно да го запре развојот на вештачката интелигенција доколку таа претставува закана за човештвото. Во интервју за Блумберг, Сулејман нагласи дека целта на Мајкрософт е создавање суперинтелигенција усогласена со човечките интереси, а не системи кои би можеле да излезат од контрола.

Според него, идејата дека технолошките компании треба да престанат со развој на опасни системи треба да биде очигледна и универзално прифатена, но во реалноста сè уште претставува релативно нов став во индустријата. Тој потенцира дека Мајкрософт нема да продолжи со развој на технологии кои имаат потенцијал да им „избегаат“ на своите креатори и да нанесат штета на луѓето.

Сулејман се приклучи на Мајкрософт на почетокот на минатата година, откако компанијата ја презеде интелектуалната сопственост и поголем дел од тимот на неговиот поранешен стартап Inflection AI. Неговата задача беше да изгради напредни производи за вештачка интелигенција кои ќе можат да се натпреваруваат со најдобрите решенија на пазарот, во период кога Мајкрософт во голема мера се потпираше на партнерството со OpenAI.

До неодамна, развојот на вакви технологии во рамки на Мајкрософт бил ограничен со договорни обврски кои ѝ забранувале на компанијата да работи на вештачка општа интелигенција или суперинтелигенција, односно системи кои би можеле да ги достигнат или надминат човечките способности. Како дел од партнерството, Мајкрософт се откажа од овие права во замена за пристап до најнапредните производи на OpenAI и за улогата што ја имаше во изградбата и опремувањето на центри за податоци за таа компанија.

По промените во договорниот однос со OpenAI, Мајкрософт доби можност да развива сопствени системи за вештачка интелигенција со поширок опсег. Сулејман истакна дека OpenAI сега има договори со други големи партнери како SoftBank и Oracle за изградба на инфраструктура, што ѝ овозможило на Мајкрософт повторно да ја насочи стратегијата кон независен развој на напредни технологии.

Тој оцени дека компанијата во изминатите 18 месеци функционирала како развивач на вештачка интелигенција за општа намена, но дека сега има простор да работи на техники и методологии кои потенцијално можат да ги надминат човечките перформанси во широк спектар задачи. Според Сулејман, ова претставува значајна промена во насоката на компанијата.

Во неодамнешен блог пост, Сулејман дополнително го објасни ставот на Мајкрософт дека суперинтелигентните системи можат да бидат успешни само ако се дизајнирани да му служат на човештвото. Слични позиции промовираат и други водечки компании во индустријата, меѓу кои OpenAI и Anthropic, кои јавно се залагаат за безбеден и одговорен развој на вештачката интелигенција во корист на луѓето.