Нов удар по џебот на возачите: Euro 7 ги поскапува автомобилите низ Европа

Новите еколошки стандарди Euro 7, кои ќе почнат да се применуваат од 29 ноември годинава, ќе донесат дополнителни трошоци за автомобилската индустрија, а дел од тие трошоци ќе бидат префрлени врз купувачите. Производителите веќе предупредуваат дека новите барања на Европската Унија ќе резултираат со повисоки цени на возилата низ целиот европски пазар.

Со Euro 7 регулативата, ЕУ по седми пат ги заострува правилата за емисии, но овојпат фокусот не е само на издувните гасови. Новите стандарди воведуваат построги критериуми и за честичките што се ослободуваат од гумите, дисковите и плочките за сопирање, со цел дополнително да се намали загадувањето од сообраќајот.

Автомобилските компании веќе започнаа да ги пресметуваат дополнителните трошоци што ќе ги донесе усогласувањето со новите правила. Меѓу првите што најавија корекција на цените е германскиот производител Volkswagen, кој на домашниот пазар веќе информираше дека моделите од новата производствена година ќе поскапат од 1 јули. Како пример се наведува моделот Volkswagen Tiguan, чија цена во Германија ќе биде повисока за околу 400 евра.

Од компанијата посочуваат дека причината за поскапувањето се новите технички барања и инвестициите потребни за исполнување на Euro 7 стандардите. Експертите оценуваат дека сличен пристап наскоро би можеле да применат и останатите производители, бидејќи адаптацијата на производството ќе бара дополнителни вложувања во развој, тестирање и нови технологии.

Поради тоа, се очекува ефектите од Euro 7 да не бидат ограничени само на германскиот пазар. Аналитичарите прогнозираат дека повисоките производствени трошоци постепено ќе се одразат врз цените на новите автомобили низ цела Европа, без разлика дали станува збор за возила со бензински, дизелски или електрифицирани погонски системи.

Иако целта на новите правила е намалување на загадувањето и подобрување на квалитетот на воздухот, автомобилската индустрија предупредува дека транзицијата кон построги еколошки стандарди ќе има своја цена. За потрошувачите тоа најверојатно ќе значи поскапи автомобили во наредниот период, додека производителите ќе мора да вложат дополнителни средства за да ги исполнат новите европски барања за заштита на животната средина.