Џеф Безос: Дури и ако пукне AI-балонот, инвестициите нема да бидат залудни

Основачот на Амазон, Џеф Безос, смета дека огромниот бран инвестиции во вештачката интелигенција може да донесе долгорочни придобивки, дури и ако сегашната еуфорија околу технологијата заврши со пазарен пад. Во интервју за CNBC, Безос порача дека технолошките „балони“ често оставаат зад себе вредна инфраструктура, нови откритија и напредок што продолжува да има влијание и по кризите.

Тој оцени дека денешниот бум околу вештачката интелигенција потсетува на периодот на биотехнолошката експанзија во деведесеттите години, кога инвеститорите масовно вложуваа во компании со нејасна иднина. Иако дел од тие инвестиции подоцна пропаднаа, технологијата и медицинските достигнувања што произлегоа од тој циклус останаа и продолжија да носат корист.

Според Безос, моменталната трка за развој на AI создава ситуација во која капитал добиваат речиси сите идеи, без оглед дали се одржливи или не. Тој смета дека пазарот сè уште не научил јасно да ги разликува добрите од слабите проекти, но дека успешните компании на крајот ќе ги оправдаат и загубите на неуспешните обиди.

Во меѓувреме, најголемите технолошки компании продолжуваат агресивно да инвестираат во дата-центри, чипови и AI-инфраструктура. Аналитичарите проценуваат дека глобалните вложувања во овој сектор годинава би можеле да надминат 700 милијарди долари. Дел од инвеститорите веќе предупредуваат дека пазарот покажува знаци на прегревање, особено по огромниот раст на вредноста на компаниите поврзани со генеративна вештачка интелигенција.

Безос откри дека и самиот активно работи на нови AI-проекти преку стартапот Project Prometheus, кој го основал заедно со поранешен извршен директор од Google X. Компанијата развива системи што би можеле да им помогнат на инженерите во дизајнирање физички производи, индустриско производство и развој на нови лекови.

Тој објасни дека идејата е создавање „вештачки инженер“ кој би можел значително да го забрза процесот на техничко проектирање и индустриски развој. Наместо проектот да биде дел од Amazon или Blue Origin, Безос решил да функционира како посебна компанија за да има поголем фокус и независен развој.

Изјавите на Безос доаѓаат во период кога светската технолошка индустрија влегува во нова фаза на интензивна конкуренција околу AI-технологиите. И покрај стравувањата од можен пазарен меур, инвеститорите и понатаму вложуваат огромни средства, убедени дека вештачката интелигенција ќе биде една од клучните технологии што ќе ја обликуваат глобалната економија во следните децении.