Швајцарската банка UBP повторно купува злато, прогнозирајќи 6.000 долари до крајот на годината

Швајцарската банка Union Bancaire Privée повторно започнува со вложувања во злато, откако претходно значително ја намали својата изложеност поради падот на цената предизвикан од војната меѓу Иран и САД.

Банката постепено го зголемува уделот на злато во портфолијата на своите клиенти, откако го намали од околу 10 на 3 проценти. Во меѓувреме, уделот повторно е зголемен на приближно 6 проценти, со планови за дополнително зголемување. Според проценките на институцијата, долгорочните изгледи за овој благороден метал остануваат позитивни.

Падот на цената на златото во изминатиот период се должи на зголемените стравувања од повисоки каматни стапки, како и на ликвидносниот притисок што ги натера инвеститорите да продаваат дел од своите позиции за да покријат загуби на други пазари. Сепак, од банката оценуваат дека по оваа корекција, позициите на инвеститорите се стабилизирани и побалансирани.

И покрај неодамнешниот пад, златото и натаму бележи значителен раст на подолг рок, со зголемување од околу 80 проценти од почетокот на 2025 година. Од Union Bancaire Privée очекуваат цената да достигне до 6.000 долари за унца до крајот на годината, потпирајќи се на континуираната побарувачка од централните банки, загриженоста околу буџетските дефицити и засилените геополитички тензии.

Во меѓувреме, неизвесноста на глобалната сцена продолжува да влијае врз пазарите. Неуспешните мировни разговори меѓу САД и Иран, како и најавите за блокада на Ормутскиот теснец, дополнително ги зголемија тензиите и придонесоа за нестабилност на цените. Од почетокот на конфликтот, златото изгуби околу 10 проценти од вредноста, делумно поради растечките инфлаторни притисоци поврзани со поскапувањето на енергенсите.

Слични проценки споделуваат и други големи финансиски институции, меѓу кои Goldman Sachs и ANZ Banking Group, кои исто така прогнозираат раст на цената на златото на подолг рок.

Во последните недели е забележано и враќање на интересот кај инвеститорите, при што фондовите поддржани со злато повторно бележат прилив на средства, делумно надоместувајќи ги претходните загуби.

Сепак, од банката предупредуваат дека за посилен раст ќе биде потребна поголема јасност околу развојот на геополитичките настани, кои и натаму остануваат клучен фактор за движењето на цената на златото.