Над 1.800 компании ставија клуч на врата за шест месеци, најпогодени се микрофирмите

Во првите шест месеци од годинава во Македонија престанале да работат 1.819 компании, покажуваат податоците од анализата изработена врз основа на базата на Бизнис Мрежа. Тоа значи дека во просек секој месец околу 300 фирми ја затвориле својата дејност, што укажува дека и натаму голем број компании се соочуваат со сериозни предизвици во работењето.

Иако бројката е висока, споредбата со минатата година покажува благо забавување на трендот. Во текот на 2025 година биле затворени вкупно 4.446 компании, па доколку динамиката од првата половина на оваа година продолжи, вкупниот број на згаснати фирми би можел да биде помал од ланскиот.

Најголемиот број затворени компании се регистрирани во Скопје. Во главниот град со работа престанале 484 фирми, што претставува повеќе од една четвртина од сите згаснати компании во државата. Ваквиот удел не е изненадувачки ако се има предвид дека најголемиот дел од економската активност и деловните субјекти се концентрирани токму во Скопје.

По главниот град, најмногу затворени компании има во Тетово, каде што престанале да работат 119 фирми. Следуваат Битола со 114, Куманово со 106 и Прилеп со 101 затворена компанија. Во овие пет градови се концентрирани повеќе од половина од сите згаснати фирми во земјата во првото полугодие.

Податоците покажуваат дека најранливи остануваат микро-компаниите. Од вкупно 1.819 фирми кои престанале со работа, дури 1.683 се микро-претпријатија, што претставува повеќе од 92 проценти од сите затворени компании. Ова укажува дека токму најмалите бизниси најтешко се справуваат со економските предизвици, растечките трошоци и неизвесноста на пазарот.

Најпогоден сектор е трговијата, заедно со дејностите поврзани со поправка на моторни возила. Во оваа област згаснале 491 компанија, што претставува речиси една третина од вкупниот број затворени фирми во државата.

Иако темпото на затворање на компании е нешто помало во споредба со минатата година, статистиката покажува дека деловното опкружување и натаму останува предизвик, особено за малите претпријатија кои имаат ограничени финансиски и организациски ресурси. Економистите предупредуваат дека токму овие компании најчесто први ги чувствуваат последиците од намалената побарувачка, повисоките оперативни трошоци и недостигот на работна сила, што директно влијае врз нивната способност да опстанат на пазарот.