Forbs ја објави најновата листа: Маск убедливо прв, Бафет се врати во топ 10

И покрај нестабилноста на технолошките берзи во текот на јуни, листата на најбогати луѓе во светот и натаму ја предводи Илон Маск, кој воедно испиша историја станувајќи првиот човек чие богатство ја надмина границата од еден билион долари.

Најголем придонес за овој рекорден раст имаше излегувањето на SpaceX на берза, по што вредноста на компанијата нагло се зголеми. Благодарение на тоа, богатството на Маск во текот на само еден месец се зголеми за околу 218 милијарди долари и на почетокот на јули достигна приближно 1,053 билиони долари.

Додека Маск бележеше историски успех, најголемиот дел од останатите членови на листата на десетте најбогати луѓе во светот се соочија со значително намалување на своето богатство. Причината е падот на технолошките акции, при што индексот Nasdaq загуби речиси три проценти, што беше значително поголем пад во споредба со индексот S&P 500.

На второто место останува коосновачот на Google, Лери Пејџ, чие богатство се намали на околу 291 милијарда долари по падот на акциите на Alphabet. Веднаш зад него е Сергеј Брин со проценето богатство од 269 милијарди долари, кој исто така беше погоден од слабеењето на вредноста на компанијата.

Четвртата позиција ја задржа основачот на Amazon, Џеф Безос, иако неговото богатство се намали за околу 28 милијарди долари, поради двоцифрениот пад на акциите на компанијата.

Еден од најголемите губитници во текот на јуни беше Лери Елисон, основачот на Oracle. По силниот раст во претходниот месец, неговото богатство се намали за околу 84 милијарди долари, откако акциите на Oracle значително ослабеа. Како резултат на тоа, Елисон падна на седмото место на светската листа.

Промените во рангирањето им овозможија на Мајкл Дел и Марк Закерберг да напредуваат по едно место. И двајцата забележаа намалување на своето богатство, но сепак се искачија на петтата, односно шестата позиција. Закерберг беше меѓу најпогодените поради падот на акциите на Meta, додека богатството на Дел претрпе помал пад.

На деветтото место останува францускиот бизнисмен Бернар Арно, сопственик на луксузната групација LVMH. За разлика од повеќето милијардери на листата, неговото богатство остана речиси непроменето во текот на месецот.

Во првите десет повторно се врати легендарниот инвеститор Ворен Бафет, чие богатство порасна благодарение на растот на акциите на Berkshire Hathaway. Од листата испадна поранешниот извршен директор на Microsoft, Стив Балмер, кој забележа значително намалување на своето богатство по падот на вредноста на акциите на технолошкиот гигант.

Според најновите податоци на Forbes, десетте најбогати луѓе во светот заедно располагаат со богатство од околу 2,95 билиони долари. Интересен податок е што деветмина од нив се американски државјани, додека единствен странец во ова друштво е Французинот Бернар Арно. Воедно, сите десет најбогати личности на светот се мажи, а секој од нив поседува богатство од најмалку 148 милијарди долари.

Forbes ги следи светските милијардери од 1987 година, а според последната годишна листа, во светот има 3.428 милијардери. Вредноста на нивниот имот постојано се менува во зависност од движењата на финансиските пазари, па затоа рангирањето редовно се ажурира согласно промените на цените на акциите и другите средства.