Трамп заработил повеќе од милијарда долари од криптовалути, а вложувал и во Apple, Microsoft и Nvidia

Годишниот финансиски извештај за имотот и приходите на американскиот претседател Доналд Трамп покажува дека во текот на 2025 година неговото богатство значително се зголемило, при што најголемиот дел од новите приходи доаѓаат од криптовалутите и дигиталните средства. Документот открива дека приходите поврзани со криптоиндустријата надминале една милијарда долари, што претставува убедливо најголем извор на заработка во изминатата година.

Најголемиот поединечен приход Трамп го остварил преку проектот World Liberty Financial, криптоплатформа во која сопственички удел има неговото семејство заедно со инвеститорот во недвижности Стив Виткоф. Продажбата на токени од овој проект му донела околу 515 милиони долари.

Дополнителни 636 милиони долари биле реализирани преку компанијата CIC Digital, која управува со неговите мемекоини и колекциите на незаменливи токени (NFT). Овие приходи потврдуваат дека дигиталните средства денес имаат значително поголемо место во неговото портфолио отколку традиционалните извори на приходи.

Иако криптовалутите доминираат во финансискиот извештај, недвижностите остануваат важен сегмент од неговото деловно работење. Во текот на минатата година тие му донеле речиси 300 милиони долари приходи. Најголем придонес имале неговите познати имоти, меѓу кои се одморалиштето Мар-а-Лаго, голф-комплексот Трамп Нешнал Дорал и неколку други голф-клубови во различни делови на Соединетите Американски Држави.

Извештајот покажува и дека Трамп продолжил активно да инвестира на берзата. Во текот на 2025 година вложил меѓу пет и 25 милиони долари во акциите на Apple, Microsoft и Nvidia, кои се меѓу неговите најголеми инвестиции во технолошкиот сектор. Покрај тоа, во септември купил и акции на Amazon во вредност од меѓу 500.000 и еден милион долари.

Интересот за технолошките компании доаѓа во период кога секторот на вештачката интелигенција бележи силен раст. Минатата година беше објавен договор меѓу американската влада и производителите на чипови Nvidia и AMD, според кој САД добија право на дел од приходите од извозот на чипови за вештачка интелигенција во Кина, во замена за издавање извозни дозволи.

Покрај деловните приходи, финансискиот извештај наведува дека Трамп примил подароци во вредност поголема од 370.000 долари. Најголемиот дел од нив се поврзани со присуство на значајни спортски настани, вклучувајќи натпревари од Светското првенство во фудбал, Супербоул, UFC, бејзбол натпревари и голф-турнири.

Најновите податоци покажуваат дека за само една година приходите од крипто-секторот повеќекратно се зголемиле. Во претходниот финансиски извештај биле пријавени околу 57 милиони долари приходи од World Liberty Financial, додека во 2025 година оваа бројка пораснала на повеќе од половина милијарда долари.

Растот на богатството дополнително бил поттикнат и од излегувањето на берза на компанијата Trump Media & Technology Group, што во моментот на листирањето значително ја зголеми неговата нето-вредност. Според најновите процени, вкупното богатство на Доналд Трамп денес достигнува околу шест милијарди долари, што е речиси две милијарди повеќе во споредба со пред две години.

Сепак, не сите негови бизниси бележат позитивни резултати. Компанијата Trump Media & Technology Group, која стои зад социјалната мрежа Truth Social, во последните месеци се соочува со сериозни деловни предизвици. Акциите на компанијата паднаа на најниските нивоа откако започнаа да се тргуваат на берзата, а фирмата веќе три последователни квартали работи со загуба. Само во првото тримесечје од годинава е пријавена нето-загуба од речиси 406 милиони долари.

Финансискиот извештај уште еднаш покажува дека структурата на богатството на Доналд Трамп значително се променила во последните години. Додека недвижностите долго време беа главниот извор на неговото богатство, денес сè поважна улога имаат криптовалутите, дигиталните средства и инвестициите во технолошки компании, кои станаа клучен двигател на неговиот финансиски раст.