Швајцарскиот Цуг го надминува Монако: Секој осми жител е милионер

Швајцарскиот кантон Цуг сè појасно се позиционира како едно од најбогатите и најатрактивните места за глобалниот капитал, надминувајќи ги дури и традиционалните симболи на луксуз како Монако. Иако се работи за мал регион со површина од околу 240 квадратни километри и приближно 130.000 жители, неговото економско влијание е далеку поголемо од неговата големина.

Според податоците, секој осми жител на Цуг е милионер, додека просечен годишен приход од околу 180.000 швајцарски франци сè уште се смета за дел од средната класа. Кантоналната економија генерира бруто домашен производ од околу 20 милијарди франци, што го става во ранг со држави како Ерменија или Намибија. Дополнително, во локалниот трговски регистар се запишани повеќе од 40.000 компании, што го прави еден од најгусто поврзаните деловни центри во Европа.

Економскиот подем на Цуг не е случајност, туку резултат на долгорочна стратегија започната уште во средината на 20 век, кога регионот вовел исклучително поволен даночен систем за компании и поединци со високо богатство. Со текот на времето, оваа политика го претворила кантонoт во магнет за мултинационални компании, трговци со суровини и технолошки фирми.

Денес Цуг е глобално препознатлив како центар на т.н. „Crypto Valley“, каде се концентрирани бројни крипто и блокчејн компании. Покрај тоа, таму има седишта и на големи корпорации од секторот на суровини, што дополнително ја зајакнува неговата позиција како финансиско јадро со меѓународно значење.

Дополнителна предност на Швајцарија е системот на паушално оданочување, кој во одредени случаи дозволува данокот да се пресметува врз основа на животниот стил и трошоците, наместо врз целокупниот приход или имот. Овој модел со децении привлекува високоимотни поединци од Европа и пошироко, а последните геополитички тензии и даночни промени во други држави дополнително ја зголемиле атрактивноста на регионот.

Сепак, силниот прилив на богатство има и своја цена. Побарувачката за недвижности значително ги зголемила цените на станбениот и деловниот простор, па станбениот пазар во Цуг денес се смета за еден од најскапите во Европа. Драстичниот раст на цените довел до ограничена понуда, при што и малите станови достигнуваат месечни кирии од неколку илјади франци, додека луксузните вили се продаваат за повеќе милиони.

И покрај високите трошоци за живот, јавните финансии на кантонoт остануваат исклучително стабилни. Последните податоци покажуваат значителен буџетски суфицит, кој им овозможува на локалните власти да ги намалуваат јавните трошоци и премиите за здравствено осигурување. Како резултат на тоа, жителите на Цуг плаќаат меѓу најниските здравствени премии во цела Швајцарија.

Но, економскиот успех сè почесто отвора и социјални прашања. Дел од критичарите предупредуваат дека растот на цените на недвижностите и трошоците за живот постепено го истиснува локалното население, додека истовремено се зголемува присуството на странски инвеститори и корпорации. Тоа создава притисок врз достапноста на домувањето и го менува социјалниот состав на регионот.

И покрај овие предизвици, Цуг продолжува да привлекува капитал од целиот свет. Во услови на глобална економска неизвесност, зголемени даночни оптоварувања и геополитички ризици, комбинацијата од стабилност, предвидливост и ниски даноци останува неговата најсилна предност. Токму затоа овој мал швајцарски кантон денес се смета за еден од најголемите добитници на глобалните економски промени.