WhatsApp воведува платена претплата: корисниците ќе плаќаат за дополнителни функции

WhatsApp започна со воведување на нова претплатничка услуга наречена WhatsApp Plus, со што популарната апликација за пораки за првпат добива платени функции наменети за приватните корисници. По периодот на тестирање на Android уредите, услугата сега постепено станува достапна и за дел од корисниците на iPhone, а месечната цена во Европа изнесува 2,49 евра.

Новата претплата е насочена кон дополнителна персонализација на апликацијата и не носи промени во основните функции за комуникација. Од компанијата нагласуваат дека испраќањето пораки, аудио и видео повиците, како и безбедносните функции ќе останат бесплатни за сите корисници.

Опцијата WhatsApp Plus се наоѓа во менито за поставки, во делот „Претплати“, а плаќањето се врши преку App Store. Корисниците ќе имаат можност и за седумдневен бесплатен пробен период пред активирање на претплатата.

Со новиот пакет, корисниците добиваат повеќе можности за визуелно прилагодување на апликацијата. Достапни се 18 различни бои за интерфејсот и 14 нови икони на апликацијата, со што секој ќе може да го менува изгледот на WhatsApp според сопствените преференции. Дополнително, претплатата носи ексклузивни анимирани налепници на цел екран, како и нови мелодии за ѕвонење и известувања.

Меѓу покорисните новитети е и можноста за закачување до 20 разговори на врвот на листата, што претставува значително проширување во однос на досегашното ограничување од три разговори.

Покрај воведувањето на претплатата, Meta најавува и идни промени поврзани со рекламирањето во апликацијата. Рекламите нема да се појавуваат во приватните разговори, туку во делот „Новости“, каде што корисниците следат канали и содржини. Засега не е познато дали корисниците кои ќе плаќаат за WhatsApp Plus во иднина ќе добијат можност за користење на апликацијата без реклами.

Новата функција моментално е достапна за корисниците на iOS верзијата 26.17.74, а од компанијата најавуваат поширока достапност во наредните недели.