Ултрабогатите трошат без ограничувања: Продажбата на луксузен накит експлодира

Швајцарскиот луксузен гигант Richemont, сопственик на Cartier и неколку престижни брендови за накит и часовници, забележа раст на приходите над очекувањата на аналитичарите, потврдувајќи дека пазарот на ултралуксуз и натаму останува отпорен и покрај глобалната економска неизвесност.

Компанијата во првиот квартал остварила приходи од 5,4 милијарди евра, што претставува раст од 13 проценти во однос на истиот период лани. Главен двигател на позитивните резултати повторно бил секторот за накит, каде брендовите Cartier, Van Cleef & Arpels, Buccellati и Vhernier регистрирале значителен пораст на побарувачката.

Продажбата на накит пораснала за 14 проценти, додека сегментот на луксузни часовници, во кој спаѓаат брендовите IWC, Jaeger-LeCoultre и Piaget, остварил минимален раст од само еден процент. Разликата уште еднаш покажува дека богатите купувачи сè повеќе инвестираат во ексклузивен накит, кој се смета и за статусен симбол и за долгорочна вредност.

Од компанијата посочуваат дека најголемиот дел од растот доаѓа од САД, Азија и Јапонија. Особено силна побарувачка е забележана кај американските купувачи, пред сè од технолошкиот сектор, чии приходи, според претседателот на Richemont, Јохан Руперт, достигнале „нереални“ размери.

Токму растот на богатството кај ултрабогатите клиенти овозможува луксузната индустрија да продолжи со раст и во време на економски забавувања, инфлација и геополитички тензии. Компанијата успеала да го надомести и падот на продажбата на Блискиот Исток, каде конфликтите во регионот и намалената туристичка потрошувачка влијаеле врз резултатите.

Руперт посочил дека американската економија сè уште покажува поголема стабилност во споредба со многу други пазари, додека оптимизмот кај потрошувачите останува присутен. Дополнително, Richemont бележи позитивни резултати и во Кина, каде новите колекции на Cartier наишле на силен интерес кај локалните купувачи.

Покрај растот на приходите, компанијата објави и зголемување на нето добивката, која достигнала 3,48 милијарди евра, во споредба со 2,75 милијарди евра една година претходно.

Сепак, резултатите не поминале без притисоци. Оперативната маржа се намалила на 20 проценти, главно поради растот на цените на суровините, особено на златото, кое претставува клучен материјал во производството на луксузен накит.

Аналитичарите оценуваат дека резултатите на Richemont дополнително ја покажуваат поделбата што сè појасно се создава во луксузната индустрија. Еден дел од пазарот зависи од средната класа и туристичката потрошувачка, додека другиот, значително поотпорен сегмент, е поддржан од глобалната елита чие богатство и трошоци продолжуваат да растат без оглед на економските кризи.