Европа масовно се свртува кон евтини електрични автомобили по растот на цените на горивата

Побарувачката за поевтини електрични автомобили во Европа нагло расте, поттикната од повисоките цени на горивата и економската неизвесност што ја засили конфликтот на Блискиот Исток. Сѐ повеќе домаќинства со пониски приходи се насочуваат кон електрични возила како поекономична алтернатива на класичните автомобили со бензински и дизел мотори.

Податоците од германската платформа Mobile.de покажуваат дека интересот за електрични автомобили со цена под 30.000 евра пораснал за 87 проценти од почетокот на март. Најголем интерес има за модели како Renault Zoe, додека вкупниот интерес за електрични возила, без оглед на цената, бележи раст од 77 проценти.

Сличен тренд се забележува и во Велика Британија. Според податоците на платформата Auto Trader, бројот на пребарувања за користени електрични автомобили стари меѓу пет и седум години е тројно поголем во споредба со истиот период лани. Побарувачката за поскапи и понови модели расте значително побавно.

Аналитичарите оценуваат дека растот на цените на горивата ги натерал потрошувачите да размислуваат подолгорочно за трошоците за користење на автомобилите. Во исто време, европските влади продолжуваат со субвенции за електрични возила. Во Германија, купувачите можат да добијат до 6.000 евра поддршка за купување нов електричен автомобил, што дополнително го зголемува интересот.

Извршниот директор на Mobile.de, Аџај Батија, изјави дека потрошувачите сега се фокусирани на достапност и ниски трошоци, а не на луксузни модели. Според него, економската несигурност и инфлацијата ги насочуваат купувачите кон поевтини електрични автомобили наместо кон скапите премиум модели.

Во меѓувреме, европскиот пазар се соочува со бран на нови поевтини електрични возила, особено поради конкуренцијата од кинеските производители. Компаниите се обидуваат да понудат модерни модели со пониски цени за да освојат поголем дел од пазарот. Во Германија, на пример, електричниот градски автомобил Leapmotor T03 може да се изнајми за само 49 евра месечно.

Податоците од британската компанија Cox Automotive покажуваат и дека вредноста на користените електрични автомобили во последните месеци се одржува подобро од онаа на бензинските и дизел возилата. Додека цените на класичните автомобили значително опаднале, електричните модели покажуваат поголема стабилност на пазарот.

Сепак, експертите предупредуваат дека е прерано да се заклучи дали овој тренд ќе доведе до долгорочен раст на продажбата. Иако интересот е значително зголемен, останува неизвесно дали европските потрошувачи ќе продолжат масовно да преминуваат на електрични возила доколку цените на горивата повторно се стабилизираат.