Шефот на Nvidia-Вештачката интелигенција ќе создава, а не да уништува работни места

Извршниот директор на Nvidia, Jensen Huang, испрати смирувачка порака во однос на стравувањата дека вештачката интелигенција ќе доведе до масовна загуба на работни места, оценувајќи дека технологијата има потенцијал да создаде повеќе работни позиции отколку што ќе укине. На настан организиран од Milken Institute, тој нагласи дека AI претставува клучна можност за нова индустријализација на САД.

Во разговорот со новинарката Becky Quick, Хуанг се осврна на растечката загриженост кај јавноста околу брзината со која се развива технологијата и нејзиното потенцијално влијание врз нееднаквоста и пазарот на труд. Сепак, тој остана оптимист, тврдејќи дека развојот на индустријата создава нови фабрики и инфраструктура, што подразбира и нови работни места, особено во производството на хардвер кој е основа на AI системите.

Според него, автоматизацијата на одредени задачи не значи автоматско исчезнување на целото работно место. Хуанг објасни дека постои разлика меѓу поединечните задачи и пошироката улога што работникот ја има во една организација, сугерирајќи дека AI повеќе ќе трансформира отколку што ќе елиминира работни позиции.

Тој исто така изрази загриженост дека претераните апокалиптични сценарија за вештачката интелигенција може да создадат неоправдан страв кај луѓето и да ја намалат подготвеноста за нејзино прифаќање. Според него, ваквите наративи ризикуваат да ја забават примената на технологијата и да ја ограничат нејзината економска корист.

Сепак, и покрај оптимизмот на дел од индустријата, постојат и поумерени проценки. Анализи од релевантни економски и академски институции укажуваат дека вештачката интелигенција би можела да доведе до исчезнување на значителен дел од работните места во наредните години, што ја одржува дебатата околу нејзиното вистинско влијание отворена.