Електричните автомобили ја намалија глобалната побарувачка за нафта за 2,3 милиони барели дневно

Електричните автомобили значително ја намалија дневната потреба за нафта во светот, покажуваат нови аналитички податоци. Според проценките на BloombergNEF, сите електрични возила на глобално ниво придонесуваат за намалување на побарувачката на нафта за околу 2,3 милиони барели дневно.

Анализата се базира на модел кој ја зема предвид продажбата и употребата на електрични возила ширум светот, вклучувајќи патнички автомобили, автобуси, камиони, како и возила на две и три тркала. Овие последните имаат особено значајна улога во вкупното намалување на побарувачката, со оглед на нивната широка употреба во многу региони, особено во земјите од Југоисточна Азија, каде што претставуваат едно од основните средства за секојдневен транспорт.

Експертите посочуваат дека растот на електромобилноста веќе почнува да има мерлив ефект врз глобалниот енергетски пазар, а трендот се очекува да продолжи и во наредните години. Според истите проценки, светската побарувачка за нафта би можела дополнително да се намалува, при што до 2030 година се очекува пад од околу 5,25 милиони барели дневно.

Овие податоци укажуваат на постепена, но јасна промена во структурата на глобалната потрошувачка на енергија, во која електричните возила стануваат сè поважен фактор во намалувањето на зависноста од нафтени деривати.