Големите нафтени компании предупредуваат на нов ценовен шок на глобалниот пазар

Најголемите нафтени компании во предупредуваат дека глобалниот пазар на сурова нафта се приближува до точка на пресврт, при што цените би можеле дополнително да растат доколку блокадата на Ормускиот теснец продолжи. Според нивните оценки, секој дополнителен ден на затворање на овој клучен поморски премин ја намалува достапноста на глобалните резерви и го зголемува притисокот врз снабдувањето.

Извршните директори на ExxonMobil, Chevron и ConocoPhillips истакнуваат дека во изминатиот период пазарот делумно се стабилизирал благодарение на користење на комерцијални залихи, стратешки резерви и претходно транспортирана нафта складирана во танкери. Сепак, тие предупредуваат дека овие извори не се одржливи на долг рок и дека нивното исцрпување може значително да влијае врз цените.

Од Exxon посочуваат дека пазарот сè уште не го почувствувал целосниот ефект од нарушувањето во снабдувањето, нагласувајќи дека потенцијалниот недостиг може дополнително да ја засили ценовната нестабилност доколку ситуацијата во регионот не се промени.

Ормускиот теснец е една од најважните светски енергетски рути, преку која дневно поминува значаен дел од глобалниот извоз на нафта и течен природен гас. Неговото затворање, кое се поврзува со тековните геополитички тензии во регионот, веќе доведе до раст на цените за повеќе од половина од почетокот на конфликтот, иако тие сè уште не достигнале историски рекорди.

Според анализи на енергетски компании и финансиски институции, досегашната стабилност на пазарот била делумно резултат на времето потребно за испорака на нафта од танкери кои биле натоварени пред ескалацијата на кризата. Но како што тие залихи пристигнуваат до своите дестинации, ефектот на намаленото снабдување станува сè поизразен.

Некои компании предупредуваат дека одредени региони, особено во Азија, веќе чувствуваат притисок преку намалување на рафинирањето и повици за ограничување на потрошувачката. Дополнително се проценува дека земјите зависни од увоз би можеле да се соочат со недостиг во наредните месеци доколку кризата продолжи.

Финансиските аналитичари укажуваат дека комерцијалните резерви во развиените економии би можеле да достигнат критични нивоа во текот на летото, што дополнително би ја намалило способноста на пазарот да апсорбира шокови. Во таков сценарио, рамнотежата би можела да се постигне само преку намалување на побарувачката.

Од нафтената индустрија предупредуваат дека колку подолго трае блокадата, толку посилни ќе стануваат ценовните сигнали на пазарот, со потенцијал за понатамошен раст на цените на суровата нафта на глобално ниво.