Саwe влезе во историјата – маратон под 2 часа во Adidas патики

Акциите на германскиот производител на спортска опрема Adidas забележаа раст на почетокот од неделата, откако неговите патики беа во центарот на историски резултат на Лондонскиот маратон. Кенискиот атлетичар Сабастјан Савe постигна резултат под две часа во официјална трка, поставувајќи нова граница во спортот и носејќи го моделот Adizero Adios Pro Evo 3.

Саwe ја заврши трката со време од 1 час, 59 минути и 30 секунди, надминувајќи ја психолошката бариера која со години важеше за речиси недостижна во атлетиката. Со овој резултат тој го собори претходниот светски рекорд и влезе во историјата како прв што официјално успеал да спушти маратон под две часа во призната трка.

По финишот, тој го подигна својот пар патики на кој беа испишани ознаките „WR“ и „sub-2“, нагласувајќи ја симболиката на историскиот момент. Неговиот успех доаѓа во време на интензивна конкуренција меѓу големите спортски брендови, особено меѓу Adidas и американскиот ривал Nike, кои со години инвестираат во развој на таканаречени „супер патики“ со цел да се подобрат перформансите на атлетичарите.

И други натпреварувачи на истата трка забележаа извонредни резултати, при што дел од нив исто така користеа ист модел патики. Ова дополнително ја зацврстува позицијата на новата генерација спортска обувка која комбинира лесни материјали, карбонски плочи и специјализирана пена за подобра ефикасност при трчање.

Според производителот, моделот Adizero Adios Pro Evo 3 тежи околу 97 грама, што го прави еден од најлесните тркачки модели на пазарот, со значително подобрена енергетска ефикасност во споредба со претходните верзии. Патиките се продаваат по цена од околу 500 долари и засега се достапни во ограничена продажба.

Пазарната реакција не доцнеше. Акциите на Adidas пораснаа за околу два проценти, иако компанијата и понатаму се соочува со пошироки предизвици поврзани со глобалните трговски услови и геополитичките тензии, кои влијаат врз нејзиното работење на клучни пазари.

Иако рекордот на Саwe неформално го поместува границите на човечките спортски можности, експертите истакнуваат дека ваквите достигнувања се резултат на комбинација од врвна физичка подготовка и технолошки напредок во спортската опрема. Тоа отвора нова дебата за улогата на технологијата во современиот спорт и дали границата меѓу човековите способности и инженерството станува сè понејасна.