Априлскиот раст од 100 милијарди долари на Интел ја прави најжешката акција на пазарот

Акциите на Intel бележат силен раст и во краток рок се вброија меѓу најперспективните на S&P 500, откако деветдневниот скок ја зголеми пазарната вредност на компанијата за повеќе од 100 милијарди долари.

Растот е поттикнат од серија позитивни вести во изминатите недели, кои повторно ја разгореа довербата кај инвеститорите дека технолошкиот гигант може да направи значаен пресврт по години на заостанување и сомнежи дека ја изгубил предноста во производството на полупроводници. Само во овој период акциите пораснаа за над 50 проценти, што претставува најсилен ваков раст во историјата на компанијата.

Дополнителен импулс дојде по одлуката на Intel да откупи дел од фабрика во Ирска за 14,2 милијарди долари од Apollo Global Management, потег што пазарите го протолкуваа како сигнал дека компанијата преминува од фаза на опстанок кон фаза на експанзија.

Позитивниот тренд беше засилен и со најавата за вклучување во технолошкиот проект на Илон Маск, во рамки на кој ќе се развиваат чипови за компаниите Tesla, SpaceX и xAI. Воедно, Alphabet најави дека ќе ги користи идните генерации на Xeon процесори на Intel во своите дата-центри.

Овие случувања придонесоа акциите на компанијата да пораснат за околу 70 проценти од почетокот на годината, надоврзувајќи се на силниот раст од претходната година, кога дополнителен поттик дадоа инвестициите од Nvidia, SoftBank и американската влада.

Сепак, и покрај силниот раст, дел од аналитичарите остануваат претпазливи. Акцијата и натаму е под нивото од 2020 година, додека поширокиот пазар бележи значително повисок раст, особено благодарение на бумот во секторот на вештачка интелигенција. Дополнително, мнозинството аналитичари немаат јасно позитивна препорака за компанијата, што укажува на задржани резерви околу нејзината иднина.

Вреднувањето на Intel во моментов е на историски високо ниво, со коефициент што значително ги надминува просеците во индустријата, што според дел од експертите укажува дека растот можеби е пребрз.

Сепак, има и такви што гледаат долгорочен потенцијал. Проекциите упатуваат дека компанијата би можела да премине од загуби оваа година кон стабилен раст на профитабилноста во наредните години. Дел од аналитичарите оценуваат дека пазарот сè уште го потценува капацитетот на компанијата за изненадување со подобри резултати, особено во споредба со конкуренцијата која веќе бележи силни перформанси.

Во услови на зголемена конкуренција и високи очекувања, идниот развој на Intel ќе зависи од способноста да ги реализира најавените стратегии и да го врати лидерството во индустријата на полупроводници.