Амазон и Лидл ќе продаваат приклучоци за соларна енергија во Велика Британија за да помогнат во намалувањето на сметките

Британската влада во соработка со Amazon и трговскиот синџир Lidl започна иницијатива за воведување на приклучни соларни панели на пазарот, што претставува значаен чекор кон поедноставување на пристапот до обновливи извори на енергија за домаќинствата.

Министерството за енергетска безбедност и нето нула емисии најави дека овие панели би можеле да станат достапни за британските потрошувачи во наредните месеци. Станува збор за технологија која веќе е широко распространета во делови од Европа и овозможува лесна инсталација на балкони, ѕидови или во дворови, без сложени градежни зафати.

Поттик за оваа мерка доаѓа во време на раст на цените на енергенсите, дополнително засилен од геополитичките тензии на Блискиот Исток. Се очекува ценовниот плафон за електрична енергија во Велика Британија да порасне за околу 20 проценти во јули, што ќе создаде дополнителен притисок врз буџетите на домаќинствата и ќе ја засили потребата од алтернативни решенија.

Приклучните соларни панели нудат практична можност за намалување на сметките за струја, бидејќи можат директно да се поврзат со домашната електрична мрежа. Особено значајни се за луѓето кои живеат во изнајмени станови, каде класичната инсталација на соларни системи често е ограничена.

Владата најави дека ќе работи со регулаторите и операторите на мрежата за прилагодување на техничките стандарди и безбедносните правила, со цел овозможување на користење на овие системи без потреба од ангажирање на стручно лице за инсталација. Овој пристап треба да ја поедностави процедурата и да ја направи технологијата подостапна за поширок круг на корисници.

Претставници на индустријата го поздравуваат потегот, оценувајќи дека станува збор за важен чекор кон поголема енергетска независност на домаќинствата и побрзо остварување на климатските цели. Во исто време, владата потврди дека новите стандарди за градба, кои стапуваат во сила, ќе бараат повеќето нови домови да бидат опремени со сопствени извори на обновлива енергија, вклучително и соларни панели.

Со овие мерки, Велика Британија се обидува да ја забрза транзицијата кон почиста енергија, додека паралелно им помага на граѓаните полесно да се справат со растечките трошоци за живот.