Рекорниот род во Бразил го турка кафето кон пониски цени

Цените на кафето се соочуваат со неизвесна перспектива, откако експертите во индустријата почнаа да ги споредуваат со движењата на пазарот на какао. Како какаото кое достигна рекордни висини во 2024 година, а потоа доживеа драматичен пад, така и кафето може да се соочи со значителен пад на цените во наредните месеци, според аналитичарите присутни на годишниот конгрес на Националната асоцијација за кафе во Тампа, Флорида.

Некои стратези, како Карли Гарнер од DeCarley Trading, сметаат дека кафето се „новото какао“. Таа укажува дека високите цени веќе ја ограничуваат побарувачката и очекува цената на арабиката да се намали на два долари за фунта до крајот на годината. Според аналитичарот на Avere Commodities, Дигби Битсон-Хирд, цените на кафето би можеле да паднат дури до 1,80 долари за фунта, со оглед на тоа што минатата недела пазарот се затвори на речиси 2,93 долари.

Како и какаото, цените на арабиката беа поддржани од негативните временски услови во тропските региони, кои го намалија производството. Во САД, дополнителен притисок создадоа тарифите воведени од претседателот Доналд Трамп. Сепак, очекувањата за рекорден род во Бразил ја туркаат цената надолу оваа година, бидејќи аналитичарите предвидуваат постепено зголемување на понудата.

Анкетата на NCA меѓу 1.500 Американци покажува дека 61 процент од потрошувачите веќе презеле мерки за намалување на трошоците за кафе. Некои ја намалија фреквенцијата на посети на кафетериите, пиеја повеќе кафе дома или се префрлија на поевтини брендови. Иако побарувачката се намали за одредени скапи арабики како колумбиските и централноамериканските сорти, поевтините робуста зрна добија удел на пазарот.

Падот на побарувачката во 2025 година, според аналитичарите на Rabobank, ја забави историската стапка на раст од 2,3 проценти годишно пред пандемијата. Сепак, се очекува дека поевтинувањето на цените ќе се пренесе кај потрошувачите и повторно ќе ја зголеми побарувачката во 2026 година за околу два проценти.

Очекуваниот рекорден род во Бразил можеби нема веднаш да донесе значително олеснување на пазарот, бидејќи фармерите се финансиски стабилни и постепено ќе го пласираат родот, задржувајќи дел од залихите за надополнување на складиштата. Ова сугерира дека пазарот на кафе ќе остане чувствителен на комбинација од понуда, побарувачка и глобални економски фактори, додека инвеститорите внимателно ги следат движењата на цените.