Инвеститорите ја мерат моќта на вештачката интелигенција додека S&P 500 бележи благ раст

Американските берзи забележаа благ раст на почетокот на тргувањето во вторник, додека инвеститорите ја преиспитуваат паниката поврзана со вештачката интелигенција што го потресе пазарот претходниот ден. Индексот S&P 500 порасна за 0,2 проценти, додека технолошкиот Nasdaq 100 доби 0,6 проценти, при што најголема поддршка дојде од технолошкиот и потрошувачкиот сектор.

Во фокусот повторно се софтверските компании, кои со месеци се под притисок поради стравувањата дека напредокот на вештачката интелигенција може да го наруши нивниот бизнис модел. Акциите на International Business Machines Corp. се стабилизираа и пораснаа за 4,5 проценти, откако ден претходно го забележаа најголемиот пад во повеќе од 25 години. Причина беше изјавата на стартапот Anthropic PBC дека неговата алатка Claude Code може да модернизира програмски јазици што се користат на системите на IBM, што ги разгоре стравувањата за потенцијална технолошка замена.

Anthropic најави нова презентација на својата алатка, што според дел од аналитичарите претставува клучен момент за пазарот. Доколку демонстрацијата не донесе ништо суштински ново, можно е олеснување кај најпогодените технолошки акции. Но, доколку се покажат конкретни и применливи решенија, загриженоста околу брзината на трансформацијата може дополнително да се засили.

Во корпоративниот дел од пазарот, вниманието е насочено и кон резултатите на Workday Inc., додека подоцна неделава извештаи се очекуваат и од Salesforce Inc., Snowflake Inc. и Intuit Inc.. Акциите на Advanced Micro Devices скокнаа за повеќе од 5 проценти откако Meta Platforms соопшти дека ќе набавува нивни чипови за развој на системи со вештачка интелигенција, додека Nvidia Corp. забележа благ пад пред објавата на резултатите.

Финансискиот сектор беше под притисок. Акциите на JPMorgan Chase & Co. се намалија откако извршниот директор Џејми Дајмон предупреди на сличности со периодот пред финансиската криза во 2008 година, кога агресивното кредитирање доведе до сериозни последици. Пад забележаа и American Express Co. и Mastercard Inc. по анализи дека вештачката интелигенција може да создаде долгорочни ризици за глобалната економија.

На економски план, цените на домовите во декември пораснале за само 0,1 процент на месечно ниво, помалку од очекувањата. Во меѓувреме, Home Depot Inc. порасна за 4 проценти по објавата на подобри од очекуваните продажни резултати, иако компанијата предупреди дека потрошувачите и натаму се воздржани кога станува збор за поголеми проекти за реновирање.

Подоцна во текот на денот се очекува обраќањето на претседателот Donald Trump, каде што темите како достапноста на домувањето и можните нови царини би можеле дополнително да влијаат врз расположението на пазарите. Инвеститорите внимателно следат дали неизвесноста околу вештачката интелигенција ќе продолжи да ја диктира насоката на Волстрит или ќе следува стабилизација по неодамнешните турбуленции.