Помалите американски банки под притисок поради трошоците за вештачка интелигенција, можни нови спојувања

Помалите банки во САД би можеле да се соочат со нов бран на спојувања и преземања поради растечките трошоци за инвестиции во вештачка интелигенција, предупредуваат аналитичари од Џеј Пи Морган Чејс.

Тимот предводен од Вивек Џунеја наведува дека речиси сите банки веќе вложуваат во развој на АИ-решенија со цел да останат конкурентни, но неизвесноста околу тоа како технологијата ќе влијае врз приходите и профитабилноста предизвика неодамнешна распродажба на банкарските акции.

„Банките што можат повеќе да инвестираат во вештачка интелигенција ќе бидат во подобра позиција – најчесто тоа се големите национални институции и дел од регионалните банки“, посочува Џунеја. Според него, иако сè уште нема доволно докази за директното влијание на АИ врз заработката, помалите играчи би можеле да бидат турнати кон консолидација за да ги компензираат потенцијалните загуби.

Минатата недела индексот на американските банкарски акции падна за 5,5 проценти, значително повеќе од падот на индексот С&П 500 од 1,4 проценти – што претставува најголемо заостанување на секторот од април наваму.

Финансиските компании беа погодени од поширокиот бран на распродажби на пазарот, додека инвеститорите проценуваат како вештачката интелигенција може да ги наруши традиционалните деловни модели. Големите банки оваа година заостануваат зад регионалните конкуренти, делумно поради нивната поголема изложеност на бизниси како управување со богатство и инвестициско банкарство – сегменти што се сметаат за ранливи на технолошки промени.

Сепак, според Џунеја, големите финансиски институции имаат поголем капацитет да ги апсорбираат трошоците и да инвестираат во технологија, а краткорочно можат да профитираат од зголемени приходи од тргување. Од друга страна, кај дел од помалите банки постои ризик од недоволно инвестирање, што би можело да ја ослаби нивната конкурентност.

Иако аналитичарите засега не очекуваат продажба на средно големи и поголеми регионални банки, притисокот од дигиталната трансформација може да ја забрза консолидацијата во секторот во наредниот период.