Американскиот енергетски гигант Chevron влегува во нов нафтен проект во источниот Медитеран

Chevron започнува нова истражувачка офанзива во Грчкото Море, со планирани нафтени дупчења јужно од Крит и во близина на Пелопонез. Со овој проект, американскиот енергетски гигант дополнително ја зацврстува својата позиција меѓу водечките играчи во регионот на источниот Медитеран.

Компанијата го предводи конзорциумот со 70 отсто удел, а финалната реализација на договорот се очекува по формалното одобрување од грчкиот парламент. Овој чекор се вклопува во пошироката стратегија на Chevron за проширување на присуството во Медитеранот, каде во последните години расте интересот за нови извори на енергија.

Првата фаза од активностите опфаќа детални сеизмички истражувања со цел да се утврди потенцијалот на јаглеводороди под морското дно. Ваквите анализи се клучни за проценка на исплатливоста на идни експлоатациски зафати и претставуваат стандарден почетен чекор во развојот на нафтени и гасни полиња.

Енергетските експерти оценуваат дека евентуалните откритија би можеле значително да ја зајакнат енергетската позиција на Грција, но и да придонесат за поголема стабилност на снабдувањето во поширокиот регион.

Chevron влегува во овој проект во момент кога веќе има силно присуство во источниот Медитеран, со активности во Израел, Кипар и Египет. Според аналитичарите, новите дупчења се одвиваат во комплексен геополитички контекст, каде енергетските ресурси стануваат сè поважен фактор во односите меѓу земјите од Европската Унија и соседните држави.