Стелантис повторно го враќа дизелот во Европа – пресврт во стратегијата

Stellantis повторно ја проширува својата понуда со дизел верзии на најмалку седум модели автомобили и патнички комбиња на европскиот пазар, сигнализирајќи пофлексибилен пристап во однос на досегашната силна ориентација кон електричните возила. Според достапните информации од дилерските мрежи и официјалните комуникации на групацијата, дизел изведбите постепено се враќаат во конфигураторите на повеќе модели.

Меѓу возилата што повторно ќе се нудат со ваков тип на мотор се компактниот Peugeot 308 и премиум хечбекот DS 4, но и неколку патнички комбиња наменети за семејства и деловни корисници. Враќањето на дизел моторите доаѓа во период кога дел од европските купувачи и натаму покажуваат интерес за возила со пониска потрошувачка и подолем досег при подолги релации, особено во сегментите каде електричната инфраструктура сè уште не е доволно развиена.

Информацијата првично ја објави Reuters, повикувајќи се на податоци од пазарот и изјави од компанијата. Од „Стелантис“ посочуваат дека намерата не е откажување од електрификацијата, туку обезбедување поширок избор на погонски решенија со цел подобро да се одговори на различните потреби на клиентите во Европа. Компанијата нагласува дека стратегијата останува насочена кон намалување на емисиите и постепена транзиција кон поодржлива мобилност, но истовремено признава дека дизел технологијата и натаму има своја улога на одредени пазари и во специфични категории возила.