Лореал со разочарувачки резултати – акциите потонаа над шест проценти

Акциите на L’Oréal забележаа остар пад на тргувањето на париската берза, откако компанијата ги соопшти резултатите за четвртиот квартал од 2025 година, кои не ги исполнија очекувањата на пазарот. Вредноста на акцијата се намали за 6,28 проценти и се спушти на 367,05 евра, со што практично беше избришан целиот раст што групацијата го оствари од почетокот на годината.

Според францускиот весник Le Figaro, инвеститорите реагирале негативно на сигналите за забавување на растот, особено во контекст на послаба побарувачка на одредени клучни пазари и зголемени оперативни трошоци. Иако компанијата и понатаму бележи стабилни приходи, динамиката на раст е значително поумерена во споредба со претходните години.

Вкупните приходи на „Лореал“ во 2025 година се проценуваат на околу 44 милијарди евра, што претставува раст од 1,3 проценти во однос на 2024 година. Иако станува збор за позитивна бројка во апсолутна смисла, темпото на раст е поскромно од она на кое инвеститорите беа навикнати, што придонесе за падот на довербата на берзата. Аналитичарите оценуваат дека компанијата ќе мора да покаже посилни сигнали за закрепнување и подобрена профитабилност во наредните квартали за да ја стабилизира вредноста на своите акции.