Локални или странски кадри: како Хрватска се обидува да обезбеди доволен персонал за претстојната туристичка сезона

Во Хрватска недостигот од сезонски работници станува се поголем пред почетокот на туристичката сезона, што ги тера работодавците да ја започнат потрагата многу порано од вообичаеното. Компаниите од секторите туризам, угостителство и трговија веќе ги активираа своите кампањи за регрутирање, со цел да обезбедат доволно персонал за претстојниот летен период. Се проценува дека оваа година ќе им бидат потребни околу 65 илјади сезонски работници, а обезбедувањето квалификувани локални кадри останува голем предизвик за одржување на високото ниво на услуга.

Според Ален Мрвац, специјалист за односи со јавноста во Alma Career Croatia/Moj posao, клучниот дел од регрутирањето се одвива уште на почетокот на годината. Пребарувањето за работници е најинтензивно во јануари и февруари, при што многу работодавци веќе до крајот на февруари успеваат да состават значителен дел од својот персонал. Понатамошните позиции се пополнуваат во случај на неочекувани ситуации, при што дополнителна потрага се врши во април или мај.

Потребата од странски сезонски работници е уште поитна. Од минатиот октомври започна регрутирањето на работници од странство, со цел да се обезбедат работни дозволи на време и да се избегнат застои во работењето. Директорот на Здружението на претприемачи во хотелската индустрија, Бернард Зензеровиќ, истакнува дека од вкупниот број од 65 илјади сезонски работници, околу 15 илјади се очекува да бидат од Хрватска, додека остатокот, приближно 50 илјади, ќе бидат странци, што е слично на минатогодишното ниво.

Истражувањето на порталот „Moj posao“ покажува дека локалните работници почесто прифаќаат сезонски работа ако платата е значително повисока, обично од 30 до 40 проценти повеќе отколку за слична работа на континентот. Најбарани се позиции како готвачи, келнери, слаткари, рецепционери, собарки, аниматори и продавачи.

Мрвац истакнува дека работодавците се насочуваат кон високо квалификуван персонал со искуство кој може да го подигне квалитетот на услугата. Ваквиот кадар е реток и бара соодветно високо платење. Во однос на критериумите, тие се малку поопуштени во споредба со претходните години – ако порано се бараа пет години искуство, сега се доволни три.

За одржување на квалитетот, многу работодавци инвестираат и во едукација на вработените. Ален Јурушиќ, менаџер на бар, објаснува дека персоналот се обучува во самите установи каде што работи, а менаџерите постојано се грижат работниците да бидат запознаени со услугите и производите што ги нудат.

Зензеровиќ дополнува дека зголемените трошоци за работна сила ја отежнуваат ситуацијата. Од 2019 година до денес, платите во хотелската индустрија се зголемија за околу 75 проценти, додека приходите се зголемија за околу 58 проценти. Според него, компаниите вложуваат големи ресурси во подобрување на условите за работа, квалитетот на сместувањето и едукацијата на персоналот.

Иако работодавците се свесни за потребата од странска работна сила, тие истовремено се обидуваат да вклучат пензионери, ученици, студенти и невработени, со цел да создадат разновиден и квалитетен тим кој ќе може да обезбеди висок стандард на услуги и автентично искуство за посетителите.