Германија се наоѓа на крстопат: Калениус алармира за капиталот што се пренасочува надвор од земјата

Шефот на „Мерцедес-Бенц“, Ола Калениус, излезе со сериозно предупредување за економската насока на Германија, нагласувајќи дека долготрајната стагнација може да предизвика политички превирања и раст на влијанието на крајната десница. Во интервју за „Дер Шпигел“, Калениус оцени дека Германија, како најголема економија во Европа, се движи во погрешна насока веќе околу 10 до 15 години и дека продолжувањето на овој тренд би можело да има сериозни последици.

Тој предупреди дека доколку економската динамика не се подобри, популистичките сили од десниот спектар ќе ја заземат сцената, но нема да имаат одржливи решенија за структурните проблеми на земјата. Калениус ги поврза дел од проблемите со опаѓањето на работната етика и конкурентноста, споредувајќи ја сегашната економска позиција на Германија со националниот фудбалски тим кој се соочува со тешкотии. „Тоа е како да се каже пред Светското првенство дека тренираме доволно, иако сите други тренираат двојно повеќе“, истакна тој.

Калениус додаде дека Германија сега се соочува со едни од највисоките трошоци за работна сила во светот. Додека порано продуктивноста успеваше да ги надомести овие трошоци, тоа повеќе не е случај, што ја намалува конкурентската предност на земјата. Тој нагласи дека не се бара воведување услови според азиски стандарди, туку дека е неопходно да се создаде економски амбиент каде претприемништвото и инвестициите во Германија ќе бидат исплатливи во однос на енергијата, даноците и трошоците за работна сила. Во спротивно, предупреди Калениус, капиталот ќе се насочи кон други пазари.

Во истото интервју, тој се осврна и на актуелната дебата за законот за работа со скратено работно време. Калениус го бранеше правото на скратено работно време за специфични причини како одгледување деца или обезбедување грижа, но истакна дека за да се одржи продуктивноста на економијата, вкупниот број работни часови во општеството мора да се зголеми. Според него, во спротивно, уникатниот мотор на германската продуктивност дополнително ќе ослаби, со што ќе се загрози економската стабилност на земјата.