Инвеститорите повлекуваат кочница: среброто доживеа најголем дневен пад годинава

Цените на среброто доживеаја силен пад во четврток, со што беше прекинат краткотрајниот дводневен раст и повторно се разгореа стравувањата од прекумерна нестабилност на пазарот на благородни метали. „Белиот метал“ се најде под силен продажен притисок, додека инвеститорите се обидуваат да се прилагодат на наглите ценовни осцилации што ја обележуваат 2025 година.

Според последните пазарни податоци, спот цената на среброто се намали за околу 13 проценти и се движеше околу 76,97 долари за унца, додека фјучерсите со испорака во Њујорк забележаа пад од над осум проценти, спуштајќи се на приближно 77,28 долари за унца. Овој остар корективен потег доаѓа по период на екстремни движења, кои во краток рок ја подигнаа, но и ја урнаа цената на среброто.

Само неколку дена претходно, среброто достигна рекордно високи нивоа, по што во петокот забележа драматичен пад од речиси 30 проценти. И покрај ваквите нагли корекции, податоците на LSEG покажуваат дека од почетокот на годината цената на среброто сè уште е во значителен пораст и на годишно ниво бележи раст од околу 146 проценти, што го вбројува меѓу најволатилните, но и најпрофитабилните суровини во овој период.

Аналитичарите посочуваат дека корекцијата кај среброто е поизразена во споредба со златото, пред сè поради построгите услови на ликвидност на лондонскиот пазар. Ограничената ликвидност придонесува за засилени ценовни флуктуации, што го прави среброто почувствително на шпекулативни движења и краткорочни промени во расположението на инвеститорите.

Во вакви услови, пазарот на сребро останува под зголемено внимание, со очекувања дека волатилноста ќе продолжи и во наредниот период, особено во контекст на глобалните монетарни политики, движењата на каматните стапки и побарувачката за индустриска употреба на благородните метали.