По најголемата банкарска интеграција во Европа, Ермоти го најави своето заминување

Серхио Ермоти, извршниот директор на швајцарската банкарска групација UBS, најави дека ќе се повлече од функцијата во април 2027 година, објави „Фајненшл тајмс“. Со тоа ќе биде заокружен неговиот втор мандат на чело на најголемата швајцарска банка, период обележан со една од најкомплексните интеграции во европскиот банкарски сектор.

Ермоти се врати во UBS во 2023 година со јасна мисија – да го предводи преземањето и интеграцијата на „Кредит Свис“, откако институцијата се најде во сериозна финансиска криза. Во моментот на враќањето, тој јавно изјави дека е подготвен да ја води банката уште три до пет години, колку што, според него, беше потребно за целосно стабилизирање и обединување на двата банкарски системи.

Во меѓувреме, Ермоти ги отфрли шпекулациите дека UBS би можела да го напушти Швајцарија поради зголемениот регулаторен притисок, нагласувајќи дека банката останува цврсто вкоренета во земјата и дека нејзината долгорочна стратегија не вклучува преселување на седиштето.

Ова не е првпат Ермоти да ја води UBS. Тој беше извршен директор и во периодот од 2011 до 2020 година, кога одигра клучна улога во стабилизирањето на банката по глобалната финансиска криза. Неговото враќање во 2023 година беше оценето како стратегиски потег во време на сериозни пазарни потреси и недоверба во банкарскиот сектор.

До неговото заминување, Ермоти ќе се фокусира на завршување на интеграцијата на „Кредит Свис“, како и на подготовка на внатрешен наследник, што според извори блиски до банката, е приоритет за одборот на директори.

Финансиски, Ермоти останува меѓу најплатените банкарски извршни директори во Европа. За 2024 година тој добил надомест од 14,9 милиони швајцарски франци, односно околу 16,8 милиони американски долари, со што ја задржал позицијата на најплатен извршен директор во европскиот банкарски сектор.