Европа тргнува кон дигитална револуција: ЕЦБ го подготвува лансирањето на дигиталното евро до 2029 година!

Европската централна банка (ЕЦБ) ја подготвува сцената за воведување на дигитално евро, со цел официјално лансирање во 2029 година, откако ќе заврши тековната подготвителна фаза овој месец. Според извори на Bloomberg, централните банкари на состанокот во Фиренца оваа недела ќе дискутираат како да продолжат со подготовките за дигиталната валута, со надеж дека до моментот на лансирање ќе биде воспоставена и потребната правна рамка.

Проектот за дигитално евро започна во 2023 година со двегодишна подготвителна фаза, со цел Европската унија да ги усвои правилата кои ќе овозможат дигиталниот еквивалент на банкнотите и монетите. Но, националните влади и Европскиот парламент сè уште не постигнаа конечен договор, а дебатата се вжештува поради различните ставови меѓу политичките групи. Најголем отпор доаѓа од дел од членовите на Европската народна партија, кои сметаат дека приватниот сектор можеби е попогодна алтернатива за имплементација на дигитални решенија.

Притисокот за напредок се зголемува поради загриженост дека Европа премногу ќе се потпира на американски платежни услуги како Visa, Mastercard и PayPal. Дополнително, расте стравот од влијанието на стабилните монети поддржани од доларот, кои би можеле да се користат на европскиот пазар. Овие фактори ја зголемуваат потребата за брз напредок и зајакнување на стратешката автономија на ЕУ, особено во услови на геополитички тензии.

Претседателката на ЕЦБ, Кристин Лагард, заедно со други членови на централната банка, ја потенцираат важноста на побрзо дејствување. Првпат јавно можниот датум за лансирање беше споменат од членот на Извршниот одбор на ЕЦБ, Пјеро Чиполоне, кој на настан на Bloomberg во септември изјави дека средината на 2029 година би била соодветна. Подготвителната фаза е дел од долгорочен план, кој вклучува детално проучување и тестирање на сите аспекти на дигиталното евро, со цел оваа нова форма на валута да се воведе без нарушување на финансиската стабилност.