Системот се тресе: Дали светот преминува на Биткоин?

Глобалниот монетарен систем се наоѓа во период на длабока трансформација, обележана со рекордна инфлација, растечки јавни долгови и опаѓање на довербата во традиционалните фиат валути. Сè поголем број инвеститори бараат засолниште за својот капитал, а трендовите на светските пазари сугерираат дека започнува драматична промена која може да го отвори патот кон процесот што многумина одамна го најавуваат – хипербиткоинизацијата. Познатиот макро-инвеститор Ден Тапиеро токму во овој момент го постави прашањето што одекнува во финансиските кругови: „Што ако хипербиткоинизацијата навистина започна?“

Последните месеци го тресат комодитетниот пазар, а златото забележа експлозивен раст од околу 25 проценти од август наваму, достигнувајќи историски рекорд од 4.300 долари за унца и пазарна вредност од над 30 трилиони долари. Со тоа, благородниот метал се најде над големите технолошки компани како Microsoft и Nvidia, додека централните банки продолжуваат агресивно да купуваат златни резерви. Геополитичките тензии и неизвесноста во однос на политиката на Федералните резерви дополнително ја зголемуваат траекторјата на бегство кон безбедни засолништа, а оваа патека сè почесто се вкрстува со крипто пазарот.

Биткоинот повторно го следи импулсот на златото и уште на почетокот на октомври ја надмина вредноста од 126.000 долари. Но, за разлика од златото, најголемата криптовалута не претставува само средство за складирање вредност, туку и паралелен, независен и технолошки отпорен финансиски систем. Податоците покажуваат дека понудата на биткоин на берзите драстично се намалува и се наоѓа на најниско ниво од 2019 година, што говори за засилен тренд на долгорочно чување, а не на шпекулативна продажба. Рударската мрежа истовремено никогаш не била помоќна, со рекордна хаш стапка од 1.030 EH/s, што укажува на зголемена стабилност и доверба во протоколот.

Институционалните актери, кои долги години се држеа на дистанца, денес стануваат дел од новиот монетарен наратив. Спот ETF фондовите во САД веќе управуваат со околу 250 милијарди долари во биткоин, а интерес се забележува и меѓу хеџ фондови и пензиски фондови. Дигиталната валута повеќе не се перцепира како маргинален експеримент, туку како валидна и глобално прифатена класа на средства.

Во вакви околности, сè погласно се поставува прашањето дали светот навистина влегува во процес на хипербиткоинизација – постепен колапс на довербата во хартиените пари и премин кон дигитални, ограничени и транспарентни монетарни системи. Ако трендовите продолжат со ова темпо, промената веројатно нема да се случи одеднаш и спектакуларно, туку тивко и постојано, сè додека „новото нормално“ не стане реалност што никој повеќе нема да ја оспорува.