PlayStation 6 можеби нема да пристигне пред 2029 година

Јапонскиот технолошки гигант Sony се соочува со сериозни предизвици во подготовките за својата следна генерација на конзоли, откако глобалниот недостиг на мемориски чипови ја наруши динамиката на производството. Според Telegraph, планираното лансирање на новата конзола би можело значително да се пролонгира, па наместо во блиска иднина, можно е пазарното деби да се случи дури кон крајот на деценијата.

Главната причина за ваквиот развој е огромниот раст на побарувачката за полупроводници, особено од страна на компаниите што развиваат и одржуваат инфраструктура за вештачка интелигенција. Мемориските чипови, кои се клучни за модерните конзоли, сè повеќе се пренасочуваат кон дата-центри и AI системи, каде што носат поголеми профити. Ова создава силен притисок врз производителите на потрошувачка електроника, кои се принудени да се натпреваруваат за ограничени количини компоненти.

Истражувањата на Counterpoint Research покажуваат дека цените на RAM меморијата драматично се зголемиле во изминатата година, што дополнително ги усложнува производствените планови на технолошките компании. Во меѓувреме, аналитичарите од TrendForce предупредуваат дека растот на цените може да продолжи и во 2026 година, што би значело уште поголем притисок врз производителите на хардвер.

Во вакви услови, следната генерација на PlayStation, која првично се очекуваше многу порано, сега се споменува како можен проект за 2028 или дури 2029 година. Доколку ваквите прогнози се остварат, гејмерите ќе мора значително подолго да ја чекаат наследничката на актуелната генерација, додека индустријата се прилагодува на новата реалност во која вештачката интелигенција станува најголемиот потрошувач на напредни чипови.