Аеродромот во Чикаго продолжува со инвестиции вредни 12 милијарди долари

Chicago O’Hare International Airport планира да обезбеди околу 476 милиони долари преку издавање општински обврзници, како дел од повеќемилијардната модернизација на еден од најпрометните аеродроми во САД.

Градот Чикаго ќе се задолжи во име на аеродромот со цел да го финансира проширувањето и реконструкцијата на терминалите, како и зголемувањето на капацитетите поради растот на бројот на летови и нови авиолинии. Средствата ќе бидат дел од капиталниот план вреден околу 12 милијарди долари – сума што значително ја надминува првично планираната инвестиција од 8,6 милијарди долари во 2018 година.

Проектот опфаќа изградба и обнова на терминали, нов транспортен систем меѓу конкорсите и модернизација на системите за багаж. Според плановите, целокупната трансформација на терминалната зона треба да заврши до 2033 година.

Продажбата на обврзниците доаѓа во време кога двете главни авиокомпании што доминираат во О’Хејр – United Airlines Holdings и American Airlines Group – водат жестока конкуренција за повеќе гејтови и летови. И двете компании во последните недели најавија нови рути од Чикаго, дополнително заострувајќи ја битката за пазарен удел.

Стратешката локација на О’Хејр на Средниот Запад го прави клучен регионален и меѓународен транзитен центар. Во 2024 година, аеродромот регистрирал околу 40 милиони патнички поаѓања, што е повеќе од двојно во споредба со аеродромот во Детроит.

Рејтинг-агенцијата S&P Global Ratings им додели на обврзниците оценка А+ со стабилна перспектива, оценувајќи дека и покрај конкуренцијата меѓу авиокомпаниите, кредитниот профил на аеродромот останува стабилен.

Според аналитичарите, силниот раст на патничкиот сообраќај по пандемијата и потребата од модернизација на застарената инфраструктура ќе продолжат да поттикнуваат зголемено задолжување во аеродромскиот сектор и во текот на оваа година.