Anthropic PBC лансира нов модел на вештачка интелигенција што може да управува со компјутери

Стартапот за вештачка интелигенција Anthropic PBC претстави нов модел, Claude Sonnet 4.6, кој е наменет да биде попаметен во користењето на компјутерите на корисниците за сложени задачи. Новиот модел, кој ќе биде достапен од вторник, може да извршува повеќестепени операции, како пополнување веб-формулари и координирање информации низ неколку прелистувачки табови, според компанијата. „Моделот сеуште заостанува зад најспособните луѓе во користењето компјутери, но напредокот е импресивен“, соопшти Anthropic во блог-пост.

Компанијата првпат воведе опција „computer use“ кон крајот на 2024 година, која му овозможи на АИ системот да ја анализира екранот на корисникот и да презема активности преку веб. Оттогаш, конкуренти како OpenAI и Alphabet Inc. (Google) развија свои модели кои можат да управуваат компјутер и да завршуваат задачи по команда на корисникот, особено рутински активности што обично ги прават луѓето.

Sonnet 4.6 станува стандардна опција за корисниците на Claude чатботот, како за бесплатните така и за Pro претплатниците. Моделот, исто така, покажува поголема сигурност при кодирање, што долго време било фокус на компанијата.

Проширувањето на Anthropic надвор од софтверските развивачи ја вознемири Волстрит во последните недели. Тивкото лансирање на алатка за автоматизација на дел од правната работа предизвика пад на пазарот, особено меѓу софтверските компании кои инвеститорите се плашат дека АИ може да ги направи застарени. Исто така, објавата на новата верзија на моделот Opus за финансиски истражувања предизвика пад на акции во финансискиот сектор.

Сепак, модели како Sonnet 4.6 носат и нови ризици. Давањето контрола на АИ софтвер може да ги направи корисниците подложни на безбедносни закани, како напади преку злонамерни команди. Anthropic изјави дека Sonnet 4.6 е значително подобар од претходниот Sonnet 4.5 во одбрана од такви закани.