Рио Тинто се повлече од преговорите за спојување со Гленкор

Рударскиот гигант „Рио Тинто“ официјално потврди дека ги прекинува разговорите за можно спојување со британската компанија „Гленкор“, ставајќи крај на повеќемесечните преговори кои привлекоа големо внимание во глобалната рударска индустрија. Со оваа одлука пропаѓа сценариото за формирање на најголемата рударска корпорација во светот, чија заедничка пазарна вредност ќе надминеше 200 милијарди долари.

Од „Рио Тинто“ соопштија дека, и покрај интензивните разговори, двете компании не успеале да најдат заедничка основа за договор кој би обезбедил доволна додадена вредност за нивните акционери. Компанијата нагласи дека внимателно ги разгледала сите можни опции, но проценила дека предложената структура на спојувањето не е во најдобар интерес на сопствениците на капиталот.

И „Рио Тинто“ и „Гленкор“, кои имаат седиште во Велика Британија и се меѓу водечките имиња во светската рударска и суровинска индустрија, во изминатиот период беа под зголемен притисок од пазарите да бараат стратешки партнерства како одговор на нестабилните цени на суровините и растечките трошоци за производство.

Иако спојувањето сега е тргнато од маса, аналитичарите оценуваат дека интересот за консолидација во рударскиот сектор ќе продолжи и во нарниот период, со оглед на глобалната побарувачка за критични минерали и метали.