Голема енергетска зделка на повидок: Западни компании мерат милијарди за имотот на „Лукоил“

Американскиот енергетски гигант „Шеврон“ и инвестицискиот фонд за приватен капитал „Квантум Капитал Груп“ подготвуваат заедничка понуда за преземање на сите странски средства на руската нафтена компанија „Лукоил“, потег што би можел значително да ја редефинира енергетската мапа надвор од Русија. Според проценките на самата компанија, вредноста на овој пакет достигнува 22 милијарди долари, односно околу 18,8 милијарди евра.

Според информации објавени во меѓународните финансиски кругови, двете компании планираат заеднички настап, по што би следела поделба на купените средства. Иако висината на понудата засега не е обелоденета, интересот се смета за еден од најзначајните во контекст на реструктурирањето на руските енергетски компании под влијание на западните санкции.

Пакетот што е предмет на потенцијалната трансакција ги опфаќа сите операции на „Лукоил“ надвор од Русија – од нафтени и гасни постројки, преку рафинерии, па сè до повеќе од 2.000 бензински пумпи распоредени низ Европа, Азија и Блискиот Исток. Токму оваа широка географска и оперативна распространетост ги прави средствата исклучително атрактивни за големи меѓународни играчи.

Од „Шеврон“ внимателно ги одмеруваат своите изјави. Портпарол на компанијата потврди дека „Лукоил“ располага со разновидно и комплексно портфолио, додавајќи дека американската корпорација континуирано ги анализира можностите за стратешки инвестиции ширум светот. Сепак, конкретни детали за потенцијалната понуда не беа откриени.

Инаку, ова не е првпат „Шеврон“ да ја разгледува можноста за влез во дел од странските операции на „Лукоил“. Во претходниот период, компанијата анализираше самостојна понуда за одредени сегменти од бизнисот, но сега очигледно се определува за партнерски пристап, со цел да се намалат ризиците и да се олесни поделбата на средствата по завршувањето на евентуалната зделка.

Аналитичарите оценуваат дека ваквиот потег доаѓа во чувствителен момент за глобалниот енергетски сектор, кој се соочува со геополитички притисоци, рестриктивни регулативи и потреба од диверзификација на изворите. Доколку трансакцијата се реализира, таа би можела да претставува една од најголемите продажби на руски енергетски средства во странство по воведувањето на санкциите, со долгорочни импликации за пазарите на горива и енергетска безбедност во повеќе региони.