Паузите за хидратација ѝ донесоа милиони на Coca-Cola за време на Светското првенство

Иако паузите за хидратација на Светското првенство предизвикаа поделени реакции кај навивачите, за Coca-Cola тие се покажаа како значајна деловна предност. Компанијата соопшти дека токму овие прекини во натпреварите придонеле за зголемена продажба на спортските пијалаци, подобри финансиски резултати и повисоки очекувања за целата година.

Како еден од главните спонзори на Светското првенство, Coca-Cola забележала силен раст на продажбата на спортскиот пијалак Powerade, кој бил меѓу најбараните производи за време на турнирот. Дополнително, паузите за хидратација создале нов простор за телевизиски реклами, што им донело дополнителна вредност и на спонзорите и на телевизиските куќи кои ги пренесуваат натпреварите.

Финансискиот директор на компанијата Џон Марфи изјави дека сè уште не е познато дали ваквите паузи ќе станат траен дел од фудбалските натпревари, но нагласи дека за Coca-Cola тие имале исклучително позитивен ефект. Освен Powerade, раст на продажбата забележале и останатите водечки брендови на компанијата, како и безалкохолните пијалаци без шеќер, кои продолжуваат да бележат стабилна побарувачка и покрај намалената потрошувачка кај дел од домаќинствата, особено во САД.

Во вториот квартал од годината приходите на Coca-Cola достигнале 13,37 милијарди долари, што претставува раст од шест проценти во споредба со истиот период лани и ги надминало очекувањата на аналитичарите. Компанијата успеала да го компензира и зголемувањето на трошоците за алуминиум и ПЕТ амбалажа благодарение на повисоката продажба.

Од компанијата претходно предупредија дека конфликтите на Блискиот Исток, особено во Иран, создаваат дополнителен притисок врз трошоците за производство и дистрибуција. Слични предупредувања упатија и други големи производители на пијалаци, кои очекуваат повисоки влезни трошоци во втората половина од годината.

Позитивните деловни резултати се одразија и на берзата. Акциите на Coca-Cola пораснаа за 1,8 проценти во претпазарното тргување, а од почетокот на годината нивната вредност е повисока за околу 20 проценти, што претставува подобар резултат во однос на конкурентот PepsiCo.

Охрабрена од досегашните резултати, компанијата ги зголеми и прогнозите за 2026 година. Coca-Cola сега очекува органскиот раст на приходите да достигне околу пет проценти, додека споредливата заработка по акција би требало да порасне меѓу девет и десет проценти, што е повисоко од претходно проектираниот раст.

Резултатите покажуваат дека големите спортски настани не носат придобивки само за организаторите и телевизиските куќи, туку можат значително да влијаат и врз продажбата на глобалните брендови, особено кога маркетингот е директно поврзан со случувањата на теренот.