На удар во САД: Мерцедес-Бенц под закана од можна забрана за продажба

Мерцедес-Бенц би можел да се најде пред сериозен предизвик на американскиот пазар доколку биде усвоен новиот предлог-закон што моментално се разгледува во американскиот Сенат. Предлогот, кој веќе доби поддршка од Трговскиот комитет на Сенатот, предвидува ограничувања за увозот, производството, продажбата и препродажбата на возила произведени од компании во кои кинески инвеститори имаат значително сопственичко учество.

Според текстот на предлог-законот, мерките би се применувале за автомобилски компании во кои кинескиот капитал надминува 15 проценти. Токму оваа одредба го стави германскиот производител Мерцедес-Бенц во центарот на вниманието, бидејќи кинеската компанија BAIC поседува удел од нешто помалку од 10 проценти, додека дополнителни околу 10 проценти се во сопственост на Ли Шуфу, основач на автомобилската групација Geely. Заедно, овие удели го надминуваат прагот што е предвиден во предложеното законско решение.

Во текот на расправата, претседателот на Трговскиот комитет на Сенатот, републиканецот Тед Круз, побара целосно да се укине прагот од 15 проценти, оценувајќи дека ограничувањето не е доволно строго. Тој отвори прашање дали ваквото решение е намерно поставено на тоа ниво за да не биде директно погоден Мерцедес-Бенц, кој е еден од најголемите конкуренти на американските автомобилски производители.

Од Мерцедес-Бенц реагираа со потсетување на своето долгогодишно присуство и значајните инвестиции во Соединетите Американски Држави. Компанијата нагласува дека во своите производствени капацитети во Алабама и Јужна Каролина вработува околу 160.000 луѓе, а преку широка продажна мрежа соработува со 386 дилерски партнери во 49 од 50 американски држави.

Во својата реакција, германскиот производител истакнува дека ниту еден акционер поединечно не поседува повеќе од 10 проценти од капиталот на компанијата и дека најголемите акционери немаат директна контрола врз управувањето, бидејќи не располагаат со одлучувачко влијание во надзорниот одбор.

Компанијата дополнително потсетува дека нејзината историја на американскиот пазар започнала уште во 1888 година и дека денес на патиштата во САД се движат околу пет милиони автомобили и комбиња од брендот. Воедно, нагласува дека во американските фабрики досега се произведени повеќе од пет милиони теренски возила и речиси половина милион комбиња, што, според компанијата, е доказ за силната позиција и довербата што брендот ја ужива кај американските потрошувачи.

Доколку предложените мерки бидат усвоени во сегашната или во построга форма, тие би можеле значително да влијаат врз работењето на голем број меѓународни автомобилски компании со кинески капитал, а Мерцедес-Бенц би бил меѓу производителите кои највнимателно ќе го следат исходот од законодавната постапка во Вашингтон.